Uzum Nasiya операторининг I чоракдаги соф фойдаси қарийб 70 фоизга ошди

Uzum Nasiya оператори ҳисобланган Solutions Lab АЖ 2026 йилнинг I чорагида соф фойдасини ўтган йилнинг мос даврига нисбатан 68,5 фоизга оширди.

Компаниянинг молиявий ҳисоботига кўра, компаниянинг реализациядан соф тушуми камайган. Мазкур кўрсаткич 2025 йилнинг I чорагидаги 1,016 трлн сўмдан 2026 йилнинг I чорагида 833,8 млрд сўмга тушган. Бу қарийб 183 млрд сўмлик камайишни англатади.

Бироқ давр харажатларининг сезиларли қисқариши якуний молиявий натижага ижобий таъсир қилган. Solutions Lab’нинг давр харажатлари 857,4 млрд сўмдан 583,9 млрд сўмга камайган. Яъни компания бу йўналишдаги харажатларини 31,9 фоизга қисқартирган.

Натижада асосий фаолиятдан фойда 143,7 млрд сўмдан 235,9 млрд сўмга ошган. Бу ўтган йилнинг мос даврига нисбатан 64,1 фоизлик ўсишдир.

Компаниянинг молиявий фаолиятдан олган даромадлари ҳам сезиларли кўпайган. Бу кўрсаткич 13,6 млрд сўмдан 28 млрд сўмга етиб, асосан фоиз кўринишидаги даромадлар ҳисобига шаклланган.

Баланс кўрсаткичларига кўра, Solutions Lab активлари I чорак якунида 1,982 трлн сўмга етган. Дебиторлик қарздорлиги эса 1,052 трлн сўмдан 1,414 трлн сўмга ошган.

Якуний натижада, Uzum Nasiya операторининг соф фойдаси 2026 йилнинг I чорагида 261,3 млрд сўмни ташкил этди. Бу 2025 йилнинг мос давридаги 155,1 млрд сўмга нисбатан 68,5 фоизга ёки 106,2 млрд сўмга кўп. Ҳисобот даврида компания фойдадан 2,5 млрд сўм солиқ тўлаган.

Маълумот учун, Solutions Lab АЖ Ўзбекистонда энг кўп солиқ имтиёзларидан фойдаланган компаниялардан бири ҳисобланади. Хусусан, 2025 йилда компания энг йирик солиқ имтиёзлари фойдаланувчилари бўйича ТОП-10 таликка кириб, 650,8 млрд сўмлик имтиёздан фойдаланган.