Трамп тарифлари ортидан миллиардерлар бир кунда $208 млрд йўқотди
Bloomberg маълумотларига кўра, дунёнинг энг бой 500 кишиси бир кунда жами 208 миллиард доллар бойлик йўқотди. Энг катта йўқотишларга дуч келганлар орасида Марк Цукерберг, Илон Маск ва Жефф Безос кабилар бор.
АҚШ президенти Доналд Трамп томонидан эълон қилинган янги тарифлар жаҳон бозорларига кучли таъсир ўтказиб, тарихдаги энг йирик бир кунлик бойлик йўқотишлардан бирига сабаб бўлди. Bloomberg Миллиардерлар Индекси жума куни дунёнинг энг бой 500 кишиси бойлиги бирлашган ҳолда 208 миллиард долларга камайганини қайд этди.
Бу индекснинг 13 йиллик тарихидаги тўртинчи йирик кунлик пасайиш бўлиб, коронавирус пандемиясининг авж палласидан бери энг каттаси ҳисобланади.
Энг катта йўқотишга учраганлар
- Марк Цукерберг (Meta): Meta акциялари 9% га тушиб, бойлиги 17,9 миллиард долларга камайди.
- Жефф Безос (Amazon): Amazon акциялари 9% га тушиб, бойлиги 15,9 миллиард долларга қисқарди.
- Илон Маск (Tesla): Tesla акциялари 5,5% га пасайиши натижасида 11 миллиард доллар йўқотди.
- Эрнест Гарсиа III (Carvana): Carvana акциялари 20%га тушиб, 1,4 миллиард доллар йўқотди.
- Тоби Лютке (Shopify): Shopify акциялари 20%га тушиб, бойлиги 1,5 миллиард долларга қисқарди.
- Бернар Арно (LVMH ): LVMH акциялари Парижда тушиб, Европадаги энг бой кишининг бойлиги 6 миллиард долларга камайди.
- Чжан Цунъюань (Huali Industrial Group): Хитой экспортларига бўлган тарифлар натижасида 1,2 миллиард доллар йўқотди.
Кўпчилик миллиардерлар йўқотишга учраган бўлса-да, баъзилар молиявий зарбалардан қутулишга муваффақ бўлди. Карлос Слим, Мексиканинг энг бой одами, бойлигини 4%га ошириб, 85,5 миллиард долларга етказди. Бу Мексиканинг Оқ Уйнинг ўзаро тариф мақсадлари рўйхатига киритилмагани туфайли юз берди. Шунингдек, Яқин Шарқдаги миллиардерлар кун давомида соф фойда қайд этган ягона тоифа бўлди.
