Telegram фойдаланувчиси @crypto номи учун 25 миллион долларлик сотув таклифини олди

Telegram ва TON (The Open Network) экотизимининг дастлабки фойдаланувчиларидан бири @crypto фойдаланувчи номи учун 25 миллион долларлик таклиф олди. Бу ҳақда Telegram асосчиси Павел Дуров мессенжердаги постида маълум қилди.

Таъкидланишича, ушбу ном 2023 йилда бор-йўғи 350 минг долларга сотиб олинган эди. 2,5 йил ичида username нархи 71 баробарга ўсган.

Ном эгаси эса яқинда ўз позициясини аниқ ифодалади: 

“Агар бу номлар мендан тортиб олинмаса, мен уларнинг барчасини хоҳлайман” ,— деган у Дуровнинг сўзларига кўра.

@crypto шу тариқа жорий йилдаги энг қиммат Telegram фойдаланувчи номига айланди. Таққослаш учун, 2024 йилда энг юқори баҳога сотилган ном @news бўлиб, 5,8 миллион долларга сотилган эди. Ундан кейинги ўринда эса 5,2 миллион долларга сотилган @auto номи туради.

Telegram фойдаланувчи номларининг бу даражада қимматлашиши бежиз эмас. Ҳар бир ном TON блокчейнида токенлаштирилган — яъни у ноёб, такрорланмас ва тўлиқ фойдаланувчига тегишли. Бу тизим фойдаланувчиларга рақамли активларига тўлиқ эгалик қилиш ҳуқуқини беради.

Павел Дуров бу ҳолатни реал эгалик кучини кўрсатувчи мисол сифатида баҳолади:

“Одамларга ўз рақамли активларига бевосита эгалик қилиш имконияти берилганда, ҳақиқий мўъжизалар содир бўлади. Telegram фойдаланувчилари — бу рақамли суверенлар. Улар ўз шахсияти ва активларига доимий ва бузилмас ҳуқуққа эга ягона йирик платформада фаолият юритишмоқда”, — дея таъкидлади у.

Аввалроқ Pinkod Snoop Dogg ва Telegram ҳамкорлигидаги янги NFT коллекцияси атиги ярим соат ичида тўлиқ сотилиб кетди.