Рустам Раҳматов IMAN бош директорлигидан кетади
Рустам Раҳматов компаниянинг кундалик бошқарувини мутахассисларга топшириб, кузатув кенгашига ўтади. Аввалроқ IFCB кенгаши аъзоси Маҳмуд Усмон унинг раҳбарликдан кетишини талаб қилганини айтган эди. Янги бош директор ким бўлиши ва алмашинув санаси ҳозирча очиқланмаган.
IMAN Holding асосчиси Рустам Раҳматов бош директорликни топшириб, фаолиятини кузатув кенгаши аъзоси сифатида давом эттиради. Бу ҳақда компаниянинг расмий баёнотида маълум қилинди.
Ижро бошқаруви тажрибали мутахассисларга ўтказилиши айтилган. Янги раҳбар ким бўлиши ва алмашинув қачон амалга ошиши ҳозирча очиқланмаган. Кузатув кенгаши раиси ва аъзолари таркиби яқин кунларда эълон қилинади.
Аввалроқ IFCB кенгаши аъзоси Маҳмуд Усмон Раҳматовнинг компания раҳбарлигидан кетиши ва ўрнига бошқа раҳбар тайинланишини талаб қилганини айтган эди. Унинг сўзларига кўра, Раҳматовни қўллаб-қувватлаган маслаҳатчилар ҳам унга “Сиз кетмасангиз бўлмайди”, деган. Усмон айрим мутахассислар Раҳматов кетмагани сабабли компанияни тарк этганини ҳам даъво қилган.
Бошқарувдаги ўзгаришлар IFCB компания фаолиятини ислом молияси мезонларига мувофиқ эмас деб баҳолаб, ҳамкорликни тўхтатганидан кейин эълон қилинди. Кенгаш инвесторлар маблағларидан фойдаланиш, автомобиллар хариди ва бошқарув харажатлари бўйича эътирозлар билдирган эди.
IMAN янги баёнотида 20 млн долларлик камомад мавжудлигини рад этди, бироқ айрим молиявий амалиётларда хатолар бўлганини тан олди. Компанияга кўра, Раҳматов учун олинган Mercedes сотилиб, маблағлар фондга қайтарилган, BYD бўйича қарздорлик эса ёпилган. Бошқарувчи компаниянинг фонд олдидаги 2,97 млн долларлик қарзини ноябрдан бошлаб олти ой ичида қайтариш ваъда қилинган.
Шунингдек, IMAN уч нафар олимдан иборат шаръий кенгаш тузишини билдирди. “Usmani’s” компанияси билан ташқи шаръий аудит бошланган, мустақил молиявий аудиторларни жалб қилиш ишлари ҳам олиб борилмоқда. Текширув натижаларини тўлиқ очиқлаш ваъда қилинган.
