Президент Марказий банк ва давлат банклари раҳбарлари фаолиятига эътироз билдирди
Шавкат Мирзиёев банкларнинг маҳаллалардаги ишидан мутлақо норози эканини билдирди. Марказий банкнинг ҳудудий раҳбарлари ва давлат банклари филиаллари бошлиқларига натижа кўрсатиш учун уч ой муддат берилди. Ўзгариш қила олмаган раҳбарлар лавозимини тарк этади.
Президент Шавкат Мирзиёев раислигида ҳудуд ва тармоқларда иқтисодий ўсишни таъминлаш бўйича биринчи ярим йиллик натижалар ҳамда йил охиригача мўлжалланган устувор вазифаларга бағишланган видеоселектор йиғилиши ўтказилмоқда.
Йиғилишда давлат раҳбари банкларнинг маҳаллалардаги фаолиятини кескин танқид қилди. Шу муносабат билан Марказий банкнинг ҳудудий бошқармалари раҳбарлари ва давлат банкларининг филиал бошлиқлари фаолиятига қатъий эътироз билдирилди.
Вилоят ва туман банклари ҳамда маҳалла уюшмалари учун жорий йил синов ва амалий аттестация йили бўлиши белгиланди.
Уларнинг фаолияти кейинги уч ойда эришилган аниқ натижалар асосида баҳоланади. Маҳаллаларда ўзгариш қила олган раҳбарлар фаолиятини давом эттиради, натижа кўрсатмаганлари эса лавозимидан кетади.
Бош прокуратура ва Ҳисоб палатасига ҳар бир маҳаллада амалга оширилаётган ишлар ҳамда юз бераётган ўзгаришларни мунтазам назорат қилиш топширилди.
