“Ўзбектелеком”нинг I ярим йилликдаги соф фойдаси қарийб 90 бараварга ошди

“Ўзбектелеком” 2026 йилнинг биринчи ярим йиллигида 896 млрд сўм соф фойда олди. Бу ўтган йилнинг мос даврига нисбатан 89,5 баравар кўп.

Компаниянинг соф фойдаси ўтган йилнинг январь–июнь ойларида 10 млрд сўмни ташкил этганди. Бир йил ичида кўрсаткич қарийб 886 млрд сўмга ошган.

“Ўзбектелеком”нинг хизматлар кўрсатишдан тушган соф тушуми 12,6 фоизга кўпайиб, 5,77 трлн сўмга етган. Хизматлар таннархи эса 3,7 фоизга ўсиб, 3,41 трлн сўмни ташкил этган.

Натижада компаниянинг ялпи фойдаси 28,5 фоизга ошиб, 2,36 трлн сўмга етди. Асосий фаолиятдан олинган фойда эса 848,4 млрд сўмдан 1,24 трлн сўмгача кўпайган.

Соф фойданинг кескин ошишига валюта курси фарқлари ҳам таъсир қилган. Компаниянинг курс фарқидан кўрган зарари 801,2 млрд сўмдан 380,5 млрд сўмгача камайган. Айни пайтда курс фарқидан олинган даромад 241,4 млрд сўмдан 429 млрд сўмга ошган.

Шу тариқа, валюта курси фарқларининг соф натижаси ўтган йилги 559,8 млрд сўмлик зарардан 48,5 млрд сўмлик даромадга айланган.

“Ўзбектелеком”нинг солиқ тўлашдан олдинги фойдаси 22,3 млрд сўмдан 1,03 трлн сўмга етган. Компания 138,1 млрд сўм фойда солиғи ҳисоблаганидан кейин 896 млрд сўм соф фойда қолган.

Ҳисобот даври якунида компания активлари 17,28 трлн сўмни ташкил этди. Бу йил бошига нисбатан 3,75 трлн сўм ёки 27,7 фоизга кўп.

Шу билан бирга, “Ўзбектелеком”нинг узоқ муддатли банк кредитлари 5,63 трлн сўмдан 7,71 трлн сўмгача ошган. Компаниянинг жами мажбуриятлари эса қарийб 14 трлн сўмга етган.