Ўзбекистонга Европа ва АҚШдан келаётган пул ўтказмалари ҳажми сезиларли ошмоқда

2026 йилнинг январь–июнь ойларида хориждан Ўзбекистонга 9,3 млрд долларлик пул ўтказмалари келиб тушди. Бу 2025 йилнинг мос давридагидан 13 фоиз ёки 1,1 млрд долларга кўп.

Пул ўтказмалари йил бошидан босқичма-босқич ошиб борган. Январь ва февралда 1,2 млрд доллардан маблағ келиб тушган бўлса, мартда бу кўрсаткич 1,3 млрд долларни ташкил этган. Апрелда ўтказмалар 1,6 млрд долларга, майда 1,7 млрд долларга ва июнда 2,2 млрд долларга етган.

Марказий банк ўсишни меҳнат мигрантлари ишлайдиган давлатларда ишчи кучига талаб ва иш ҳақи юқори даражада сақланиб қолгани билан изоҳлаган. Айрим миллий валюталарнинг долларга нисбатан мустаҳкамланиши ҳам ўтказмалар қийматининг ошишига таъсир қилган.

Хусусан, 2026 йилнинг биринчи ярмида Россия рубли АҚШ долларига нисбатан ўртача 13,5 фоизга мустаҳкамланди. Россияда ўртача номинал иш ҳақи эса биринчи чоракда йиллик 15,1 фоизга, реал ҳисобда 8,7 фоизга ошиб, 106,9 минг рублни ташкил этди.

Буюк Британиядан ўтказмалар 62 фоизга ошган

Биринчи ярим йиллик натижалари пул ўтказмалари географияси кенгайиб бораётганини кўрсатади.

Қозоғистондан юборилган маблағлар 2025 йилнинг мос давридаги 366 млн доллардан 469 млн долларга етган. Ўсиш 28 фоизни ташкил этган.

АҚШдан пул ўтказмалари 19 фоизга ошиб, 313 млн доллардан 372 млн долларга кўпайган. Европа Иттифоқи давлатларидан тушумлар эса 27 фоизга ўсиб, 251 млн доллардан 319 млн долларга етган.

Жанубий Кореядан ўтказмалар 282 млн доллардан 314 млн долларга, Туркиядан эса 266 млн доллардан 303 млн долларга ошган.

Энг юқори ўсиш Буюк Британияда қайд этилган. Ушбу мамлакатдан Ўзбекистонга юборилган маблағлар 89 млн доллардан 144 млн долларга ёки 62 фоизга кўпайган.

Европа Иттифоқи ичида Ирландиядан ўтказмалар 86 фоизга, Литвадан 18 фоизга ва Нидерландиядан 7 фоизга ошган.

Шарҳда алоҳида кўрсатилган Қозоғистон, АҚШ, Жанубий Корея, Туркия, Буюк Британия ва Европа Иттифоқидан жами 1,9 млрд доллар келиб тушган. Бу умумий ўтказмаларнинг қарийб 21 фоизига тенг.

Пулнинг ярмидан кўпи карталарга тушган

Хориждан келган маблағларнинг 4,8 млрд доллари ёки 51,7 фоизи жисмоний шахсларнинг банк карталарига тўғридан тўғри P2P шаклида юборилган. Ушбу канал орқали ўтказмалар бир йил ичида 32 фоизга ошган.

Анъанавий халқаро пул ўтказмалари тизимлари орқали 4,3 млрд доллар келиб тушган. Бу ўтган йилнинг мос давридагидан атиги 0,3 фоизга кўп. Мазкур каналнинг умумий тушумдаги улуши 46,7 фоизни ташкил этган.

SWIFT орқали жисмоний шахсларга юборилган маблағлар эса 43 фоизга камайиб, 142 млн долларга тушган. Натижада ушбу канал жами ўтказмаларнинг 1,6 фоизини ташкил қилган.

Шу тариқа, карталарга тўғридан тўғри келадиган P2P ўтказмалар хориждан пул юборишнинг энг йирик каналига айланган. Марказий банк буни ўтказмаларнинг тезкорлиги, транзакция харажатлари нисбатан камлиги ва рақамли тўлов хизматларининг оммалашуви билан изоҳлаган.

Жаҳон банки ҳисоб-китобларига кўра, 2025 йилнинг биринчи чорагида мобил ўтказмалар халқаро пул жўнатишнинг энг арзон усули бўлган. Ушбу усулда ўртача харажат юборилаётган маблағнинг 3,6 фоизини ташкил этган.

Меҳнат миграцияси географияси кенгаймоқда

Миграция агентлиги маълумотларига кўра, ҳозир 40 га яқин давлатда тахминан 1,4 млн нафар Ўзбекистон фуқароси меҳнат қилмоқда.

Шундан 258 минг нафари Европа давлатларида, 84,4 минг нафари Қозоғистонда, 72,1 минг нафари Туркияда ва 46,4 минг нафари Жанубий Кореяда ишламоқда.

Хорижда меҳнат қилаётган ўзбекистонликларнинг 398,9 минг нафари ёки 28,6 фоизини хотин-қизлар, 402,1 минг нафари ёки 28,9 фоизини ёшлар ташкил этади.

Марказий банк шарҳида Европа ва Шарқий Осиё йўналишларида меҳнат миграцияси кенгайиб бораётгани қайд этилган. Европа минтақасидаги кўрсаткич 42 фоизга, Шарқий Осиёда эса 26 фоизга ошган.

2026 йилда 124,5 минг нафар фуқаро хорижда юқори даромадли ишларга ташкилий тарзда жойлаштирилган.

Ўзбекистон ташкилий меҳнат миграцияси бўйича 23 та давлат билан 48 та ҳукуматлараро ва идоралараро келишув тузган. Бундан ташқари, 36 та давлатдаги 325 дан ортиқ йирик иш берувчи ва рекрутинг компанияси билан ҳамкорлик йўлга қўйилган.

Германия, Буюк Британия, Италия, Испания, Швеция, Франция, Болгария, Руминия, Словакия, Словения, Сербия, АҚШ ва Япония истиқболли йўналишлар сифатида кўрсатилган. АҚШ, Италия, Швеция, Франция ва Словения янги йўналишлар қаторига қўшилган.

Ушбу давлатларга фуқароларни савдо ва хизмат кўрсатиш, соғлиқни сақлаш, транспорт ва логистика, қишлоқ хўжалиги, саноат, қурилиш, пайвандлаш, металлга ишлов бериш, нефть-газ ва кончилик соҳаларида ишга жойлаштириш режалаштирилган.

Ўзбекистондан хорижга 1,3 млрд доллар юборилган

Январь–июнь ойларида Ўзбекистондан хорижга юборилган пул ўтказмалари 8 фоиз ёки 100 млн долларга ошиб, 1,3 млрд долларни ташкил этди.

Шунга қарамай, мамлакатга келган ўтказмалар ташқарига юборилган маблағлардан 8 млрд долларга кўп бўлган. Кирувчи пул ўтказмалари чиқувчи ўтказмалардан қарийб етти баравар юқори шаклланган.

Умуман, биринчи ярим йиллик натижалари Ўзбекистонга пул ўтказмалари ҳажми ошиши билан бирга, уларнинг географияси ва юбориш усуллари ҳам ўзгараётганини кўрсатади. Ривожланган давлатлардан тушумлар тез суръатларда кўпаймоқда, P2P ўтказмалар эса биринчи марта асосий каналга айланган.