Ўзбекистонда қайси банкларнинг карталари Apple Pay ва Google Pay’да ишлайди?
Бугундан маҳаллий банк карталарини Apple Wallet ва Google Wallet’га улаб, смартфон орқали контактсиз тўлов қилиш имконияти пайдо бўлди. Google Pay рўйхатида тўққизта, Apple Wallet’да эса саккизта банк кўрсатилган. Ҳозирча хизматлар Visa ва Mastercard карталарини қўллаб-қувватламоқда.
27 октябрдан Ўзбекистонда чиқарилган банк карталарини Apple Pay ва Google Pay’га улаш бошланди.
Google’нинг расмий маълумотига кўра, Google Wallet’га қуйидаги банкларнинг карталарини улаш мумкин:
| Банк | Қўллаб-қувватланадиган карталар |
|---|---|
| AVO Bank | Mastercard дебет |
| Octobank | Visa ва Mastercard кредит ҳамда дебет |
| Uzum Bank | Visa кредит |
| TBC Bank | Visa ва Mastercard кредит ҳамда дебет |
| Алоқабанк | Mastercard дебет, Visa кредит ва дебет |
| Kapitalbank | Visa ва Mastercard кредит ҳамда дебет |
| Ипак Йўли Банк | Mastercard дебет, Visa кредит ва дебет |
| Ўзмиллийбанк | Mastercard дебет, Visa кредит ва дебет |
| Orient Finans Bank | Mastercard кредит ва Visa дебет |
Google картанинг рақамли ҳамён билан ишлашини уни чиқарган банк белгилашини қайд этган. Контактсиз тўлов учун NFC технологиясига эга Android смартфон ва Google Wallet иловаси керак.
Apple Pay’да қайси банклар бор?
Apple Wallet’да Ўзбекистондаги саккизта банк кўрсатилган. Уларнинг қуйидаги тўлов тизимларига тегишли карталарини улаш мумкин:
| Банк | Кўрсатилган тўлов тизимлари |
|---|---|
| Uzum Bank | Visa |
| Orient Finans Bank | Visa ва Mastercard |
| Ўзмиллийбанк | Visa ва Mastercard |
| Kapitalbank | Visa ва Mastercard |
| Ҳамкорбанк | Visa |
| Ипак Йўли Банк | Visa ва Mastercard |
| TBC Bank | Visa ва Mastercard |
| Octobank | Visa ва Mastercard |
Apple рўйхатдаги банкларнинг айрим карталари қўллаб-қувватланмаслиги мумкинлигини билдиради. Муайян картани улаш имкониятини уни чиқарган банкдан аниқлаштириш тавсия этилади.
Банклар янги хизмат учун акцияларни ҳам тайёрлаган. TBC Bank Осмон Mastercard кредит картаси билан Apple Pay орқали қилинган биринчи контактсиз харидга 100 фоиз, кўпи билан 50 минг сўм кешбэк таклиф қилмоқда. Акция шартларига кўра, у 30 ноябргача амал қилади.
