Ўзбекистонда меҳнат бозори қандай ўзгармоқда?
Бўш иш ўринлари сони 41 мингга тушиб, ишсизлик даражаси 5.7% га камайди.
Шу билан бирга, меҳнат миграцияси 6.2 миллион кишига етиб, 2023 йилга нисбатан 29% га ошди.
Ўртача иш ҳақи эса 5.4 миллион сўмни ташкил этиб, реал ўсиш 7.1% га етди.
Марказий банк маълумотларига кўра, 2024 йил IV чорагида 41 минг бўш иш ўрни эълон қилинган. Бу III чоракдаги 54 минг иш ўринга нисбатан камроқ бўлса-да, мавсумий омиллар ва тезроқ ишга жойлашиш жараёнлари бунга сабаб сифатида келтирилмоқда. Энг талабгир соҳалар чакана савдо (21%), ишлаб чиқариш (16.1%) ва умумий овқатланиш (15.7%) бўлиб қолмоқда. Бироқ, қурилиш (-45%), умумий овқатланиш (-30%) ва таълим (-26%) соҳаларида бўш иш ўринлари камайган.
Ишсизлик даражаси 2024 йил III чораги якунига келиб 5.7% га тушди (2023 йилда 6.8% эди). Иқтисодий фаол аҳоли сони 15.1 миллион кишига етиб, бандлик даражаси 14.2 миллионга ошди. Янги иш ўринларининг аксарияти хизмат кўрсатиш ва технологик соҳалар ҳисобига яратилган бўлса-да, қишлоқ хўжалиги ва саноатдаги бандлик пасаймоқда.
2024 йилда якка тартибдаги тадбиркорлар сони 18% га ошиб, 284 мингга етди. Уларнинг аксарияти чакана савдо ва маиший хизмат кўрсатиш соҳаларида фаолият юритмоқда. Шу билан бирга, ўзини ўзи банд қилганлар сони 4.5 миллион кишига етиб, 2023 йилга нисбатан 1.8 баробарга кўпайди.
Иш ҳақи ўзгаришлари
2024 йил якунида ўртача номинал иш ҳақи 5.4 миллион сўмни ташкил этди, бу 2023 йилга нисбатан 17.4% га кўп. Реал иш ҳақи эса 7.1% га ошган. Энг юқори ўртача иш ҳақи қурилиш соҳасида (5.9 миллион сўм) қайд этилган бўлса, таълим (3.64 миллион сўм) ва соғлиқни сақлаш (3.41 миллион сўм) соҳаларида нисбатан пастроқ даражада қолмоқда. Банк-молия, ахборот-коммуникация ва умумий овқатланиш соҳаларида иш ҳақи ўсиш суръати пасайган.
Мавзуга доир: 2024 йил Ўзбекистонда ўртача ойлик иш ҳақи қанча бўлди?
Меҳнат миграцияси
2024 йилда Ўзбекистон фуқароларининг меҳнат миграцияси сезиларли ошиб, 6.2 миллион кишига етди (2023 йилга нисбатан 29% кўп).
Энг кўп миграция Россия ва Қозоғистонга йўналтирилган бўлса, Европа Иттифоқи (Полша, Литва, Германия, Латвия) мамлакатларига миграция ҳажми ортмоқда.
Буюк Британияда мавсумий визаларга талаб юқори бўлиб, Жанубий Кореяда ҳам таълим ва меҳнат миграцияси ўсишда давом этмоқда. Шунингдек, Туркияда яшаш гувоҳномаси олган Ўзбекистон фуқаролари сони 45.3 мингга етган.
