Ўзбекистонда картадан-картага пул ўтказишда ўтказма мақсадини кўрсатиш талаб қилиниши мумкин
Марказий банк тижорат банклари ва тўлов ташкилотларига мобил иловалар орқали амалга ошириладиган картадан-картага ўтказмаларда “ўтказма мақсадини кўрсатиш” функциясини жорий этиш бўйича кўрсатма юборган. Янги тартибга кўра, фойдаланувчилар пул ўтказаётганда ўтказма сабабини танлаши керак бўлади.
Эндиликда Ўзбекистонда картадан-картага пул ўтказилганда ўтказма мақсадини ҳам кўрсатиш талаб қилиниши мумкин.
Ижтимоий тармоқларда тарқалган хабарларга кўра, Марказий банк тижорат банклари ҳамда тўлов ташкилотларига мобил иловалар орқали амалга ошириладиган картадан-картага ўтказмаларда “ўтказма мақсадини кўрсатиш” функциясини жорий этиш бўйича кўрсатма юборган.
Унга кўра, фойдаланувчи пул ўтказмасини амалга ошираётганда ўтказма сабабини танлаши керак бўлади.
Ҳозирча айрим банк иловалари ва тўлов хизматларида ушбу талаб ишга туширилган бўлса, бошқаларида ҳали жорий этилмаган. Бироқ яқин вақт ичида барча иловаларда мазкур тартиб йўлга қўйилиши кутилмоқда.
Маълум қилинишича, регулятор бу талабни жорий этмаган банклар ва тўлов ташкилотларига нисбатан чора кўрилиши мумкинлиги ҳақида огоҳлантирган.
Юборилган кўрсатмага кўра, ўтказма мақсадлари 16 та турга бўлинган. Улар орасида товар ёки хизмат учун тўлов, овқатланиш харажатлари, ижара тўлови, таълим харажатлари каби тоифалар мавжуд.
