Ўзбекистонда илк ипотека облигациялари эмиссияси давлат рўйхатидан ўтказилди
Истиқболли лойиҳалар миллий агентлиги Ўзбекистонда илк бор 40,5 млрд сўмлик ипотека облигациялари эмиссиясини давлат рўйхатидан ўтказди. Ушбу облигациялар “UMRS SPV” МЧЖ томонидан чиқарилган бўлиб, бир дона облигациянинг номинал қиймати 100 сўмни ташкил этади.
Ўзбекистон Республикаси Истиқболли лойиҳалар миллий агентлиги (ILMA) 40,5 млрд сўм миқдоридаги илк ипотека облигациялари эмиссиясини давлат рўйхатидан ўтказди. Бу ҳақда агентлик матбуот хизмати хабар берди.
Облигациялар эмитенти сифатида “Ўзбекистон ипотекани қайта молиялаштириш компанияси” АЖнинг ихтисослашган шўба тузилмаси — ипотека агенти вазифасини бажарувчи “УМРC SPV” МЧЖ иштирок этмоқда. Мазкур компания 2025 йил апрель ойида ташкил этилган.
Облигациялар чиқарилиши ипотека қопламаси ҳамда “Ўзбекистон ипотекани қайта молиялаштириш компанияси” АЖнинг кафиллиги билан таъминланган. Бир дона облигациянинг номинал қиймати 100 сўмни ташкил этади.
Ипотека облигацияси бу нима?
Ипотека облигацияси — бу ипотека кредитлари ёки ипотека активлари билан таъминланган қимматли қоғоз ҳисобланади. Оддийроқ айтганда, банклар ёки ипотека ташкилотлари берган уй-жой кредитлари асосида облигациялар чиқарилади ва улар инвесторлар томонидан сотиб олинади.
Инвесторлар облигацияларни харид қилиш орқали ипотека бозорига маблағ киритади, эмитент эса жалб қилинган маблағларни янги ипотека кредитларини молиялаштириш ёки мавжуд кредитларни қайта молиялаштиришга йўналтиради.
Эмиссия доирасида жалб қилинадиган маблағлар ипотека кредитларини молиялаштириш ва қайта молиялаштиришга йўналтирилади.
Мазкур эмиссия Ўзбекистон Республикаси Президентининг 2025 йил 21 февралдаги ПФ-26-сон “Уй-жой ва ипотека бозорини янада ривожлантиришга оид қўшимча чора-тадбирлар тўғрисида”ги Фармони ижросини таъминлаш мақсадида қабул қилинган Ипотека облигацияларини чиқариш соҳасида “Тартибга солиш қумдони” махсус ҳуқуқий режими доирасида ипотека облигацияларининг эмиссияси ва муомаласи тўғрисидаги вақтинчалик низомига мувофиқ амалга оширилган.
Агентликка кўра, ипотека облигациялари бозорининг ривожланиши ипотека активларини ликвид бозор инструментларига айлантириш орқали узоқ муддатли молиявий ресурсларни жалб қилишнинг самарали механизмини шакллантиришга хизмат қилади.
Бу, ўз навбатида, капитал бозорининг ривожланиши ҳамда республикада уй-жой қурилишини қўллаб-қувватлашга ёрдам беради.
ILMA ипотека облигацияларининг пилот чиқарилишини миллий капитал бозорини ривожлантириш йўлидаги муҳим босқич сифатида баҳоламоқда. Агентликка кўра, ушбу инструмент капитал бозоридаги молиявий воситалар турини кенгайтириш, узоқ муддатли инвестицияларни жалб қилиш ва иқтисодиётда молиявий ресурсларни самарали қайта тақсимлаш имкониятларини оширади.
