Ўзбекистон январда олтин ва газ экспортини амалга оширмади
2026 йил январь ойида Ўзбекистон олтин ва табиий газ экспортини амалга оширмади.
Шу билан бирга, газ импорти кескин ошиб, 167,6 млн долларни ташкил этди.
Импорт ҳажмининг тезроқ ўсиши эса ташқи савдо балансида 2,4 млрд долларлик салбий сальдони юзага келтирди.
2026 йил январь ойида Ўзбекистоннинг ташқи савдо айланмаси 5,8 млрд долларни ташкил этди. Бу 2025 йилнинг мос даврига нисбатан 29,2 фоизга юқори кўрсаткичдир.
Ҳисобот даврида экспорт ҳажми 1,7 млрд долларни (+26,7 фоиз), импорт эса 4,1 млрд долларни (+30,3 фоиз) ташкил қилди. Эътиборлиси, импорт экспортга қараганда тезроқ суръатда ўсди.
Натижада ташқи савдо балансидаги салбий сальдо январь ойида 2,4 млрд долларга етди.
Январь ойида Ўзбекистон олтин экспортини амалга оширмади. Шунга ўхшаш ҳолат 2024 ва 2025 йилларнинг илк ойларида ҳам кузатилган эди.
Бундан ташқари, 2026 йил январида табиий газ экспорти ҳам тўхтатилди. Аксинча, газ импорти кескин ошди: январь ойида импорт ҳажми 167,6 млн долларни ташкил этиб, ўтган йилнинг шу даврига нисбатан 6,9 бараварга кўпайди.
Маълумот учун 2025 йил якунлари Ўзбекистон олтин экспорти тарихида рекорд натижани қайд этди.
Йил якунларига кўра, Ўзбекистоннинг қимматбаҳо металлар экспорти ҳажми 9,9 млрд доллардан ошди, бу эса 2024 йилга нисбатан 32,3 фоизга кўп. Олтин умумий экспорт таркибининг 29,3 фоизини ташкил этади. Ушбу кўрсаткич мамлакат тарихидаги энг юқори экспорт натижаси ҳисобланади.
