Ўзбекистон кетма-кет бешинчи ой олтин экспортини амалга оширмади
Ўзбекистон 2025 йил октябридан буён олтин экспортини амалга оширмаяпти.
Натижада жорий йил январь-февраль ойларида мамлакатнинг жами экспорт ҳажми 23,4 фоизгача камайди.
Шу билан бирга, мамлакат ташқи савдо балансида 4,51 млрд долларлик манфий сальдо шаклланди.
Ўзбекистон кетма-кет бешинчи ойда ҳам олтин экспортини амалга оширмади.
2026 йил январь–февраль ойларида Ўзбекистон ташқи савдо айланмаси 11,6 млрд долларга етди. Бу ўтган йилнинг мос даврига нисбатан 767,4 млн доллар ёки 7,1 фоизга кўп.
Умумий савдода экспорт ҳажми 3,55 млрд долларга тушиб кетди. Бу кўрсаткич 2025 йилнинг мос даврига нисбатан 23,4 фоизни ташкил этди.
Айни пайтда импорт ҳажми 8,06 млрд долларга етиб, 29,8 фоизга ўсди. Ҳисобот даврида ташқи савдо баланси 4 511,5 млн АҚШ доллари миқдорида манфий сальдо билан шаклланди.
Экспорт ҳажмидаги мазкур пасайиш Ўзбекистон кетма-кет бешинчи ой ҳам олтин сотишни тўхтатгани билан изоҳланади.
Шу билан бирга, махсус экспортни ҳисобга олмаганда, товарлар экспорти барқарор ўсишни намоён этди. У 2,1 млрд АҚШ долларини ташкил этиб, ўтган йилнинг мос даврига нисбатан 24,0 фоизга ошди.
Ўзбекистон январь ойида ҳам олтин ва газ экспортини амалга оширмаган эди.
Шунингдек, мамлакат октябрь, ноябрь ва декабрь ойларида ҳам олтин экспортини амалга оширмай, аксинча олтин харидини амалга оширган.
Натижада Ўзбекистон олтин-валюта захиралари кетма-кет еттинчи ой рекордни янгилади.
Марказий банк захиралари қиймати февраль ойида 2 млрд долларга кўпайиб, 77,08 млрд долларни ташкил этди. Бир ой ичида захиралардаги олтин қиймати 2,7 млрд долларга ошди.
