Ўзбекистонда “дача”лар фаолиятини тартибга солиш режалаштирилмоқда
Жамоатчилик муҳокамасига қўйилган Президент қарори лойиҳасига кўра, ижарага бериладиган дала ҳовлилар “жойлаштириш воситалари” сифатида тан олинади ва улар учун лицензия талаб этилмайди. 2027 йилдан бошлаб барча объектлар ўз хизмат нархларини махсус платформага киритиб бориши шарт бўлади, мавжуд дала ҳовлилар эса 2026 йил охиригача тўлиқ рўйхатдан ўтказилади.
Ўзбекистонда дала ҳовлиларни ягона электрон базага киритиш ва яширин иқтисодиёт улушини қисқартириш режалаштирилмоқда. Бу ҳақда Солиқ қўмитаси томонидан жамоатчилик муҳокамасига қўйилган Президент қарори лойиҳасида маълум қилинган.
Қарорга кўра, фуқаролар ёки компанияларга тегишли бўлган ва вақтинча ижарага бериладиган ҳовли-жойлар ҳамда дачалар “жойлаштириш воситалари” сифатида эътироф этилади. Бундай фаолиятни юритиш учун алоҳида рухсатнома ёки лицензия талаб қилинмайди. Шунингдек, дала ҳовлиларда дам олувчилардан турист (меҳмонхона) йиғими ундирилмайди.
Соҳада инсон омилини камайтириш мақсадида Миллий туризм ягона платформаси ишга туширилади. 2027 йил 1 январдан бошлаб барча меҳмонхоналар ва дала ҳовлилар ўз хизмат нархларини платформага мунтазам киритиб бориши шарт бўлади.
“Солиқ” мобил иловаси орқали тузиладиган ижара шартномалари ушбу платформа билан реал вақт режимида интеграция қилинади. 2026 йил якунига қадар мамлакатдаги барча мавжуд дала ҳовлилар тўлиқ рўйхатдан ўтказилиши режалаштирилган.
Шунингдек, платформада рўйхатдан ўтмаган ёки ноқонуний фаолият юритаётган дала ҳовлилар ҳақида солиқ органларига хабар берган фуқаролар рағбатлантирилади. Агар ҳолат тасдиқланса, мурожаат муаллифига ундирилган жарима суммасининг 30 фоизи миқдорида мукофот берилади. Хабар берган шахснинг шахси эса қатъий сир сақланиши кафолатланади.
