Ўзбекистон банклари тўққиз ойда қанча соф фойда олди?
Ўзбекистон банклари 2026 йилнинг январь–сентябрь ойларида 15,26 трлн сўм соф фойда олди. Бу ўтган йилнинг мос даврига нисбатан 40,3 фоизга кўпроқ.
Банклар орасида энг кўп соф фойдани 2,07 трлн сўм билан “Ипотека-банк” қайд этди.
Мамлакатдаги 34 та банкдан 32 таси тўққиз ойликни фойда билан якунлаган. “Микрокредитбанк” 50,4 млрд сўм, TBC Bank эса 69,6 млрд сўм зарар қайд этган.
2026-йилнинг январь–сентябрь ойларида Ўзбекистон банкларининг жами соф фойдаси 15,26 трлн сўмни ташкил этди. Бу ўтган йилнинг мос даврига нисбатан 40,3 фоизга кўпроқдир.
Банклар олган жами соф фойданинг қарийб ярми бешта банк ҳиссасига тўғри келди. Ипотека-банк, Ўзмиллийбанк, Ҳамкорбанк, Капиталбанк ва Ўзсаноатқурилишбанк биргаликда 7,62 трлн сўм соф фойда олган. Бу сектор умумий натижасининг 49,96 фоизига тенг.
Энг катта соф фойдани Ипотека-банк қайд этди. Банкнинг тўққиз ойлик натижаси 2 трлн 72,3 млрд сўмни ташкил этган. Ўтган йилнинг мос даврида бу кўрсаткич 102,5 млрд сўм бўлган эди. Шу тариқа, соф фойда қарийб 20,2 баравар ошиб, банк рейтингда 19-ўриндан биринчи ўринга кўтарилди.
Ўзмиллийбанк 1 трлн 552,2 млрд сўм билан иккинчи, Ҳамкорбанк эса 1 трлн 480,4 млрд сўм билан учинчи ўринни эгаллади. Уларнинг соф фойдаси ўтган йилнинг мос даврига нисбатан тегишлича 7,1 фоиз ва 16,8 фоизга ошган.
Капиталбанкнинг соф фойдаси 13,5 фоизга кўпайиб, 1 трлн 313 млрд сўмга етди. Ўзсаноатқурилишбанкда эса кўрсаткич 12,9 фоизга камайиб, 1 трлн 207 млрд сўмни ташкил этди. Натижада SQB иккинчи ўриндан бешинчи ўринга тушган.
Халқ банки катта ўсиш қайд этган банклардан бири бўлди. Унинг соф фойдаси 269,1 млрд сўмдан 837,3 млрд сўмга кўтарилган. Бир йиллик ўсиш 568,2 млрд сўм ёки 211,1 фоизни ташкил этди.
Нисбий ҳисобда Uzum Bank ажралиб турди. Банкнинг соф фойдаси 7,6 млрд сўмдан қарийб 485 млрд сўмга етиб, қарийб 64 баравар ошган. Шу тариқа, банк рейтингда 17 поғона юқорилаб, 13-ўринни эгаллади.
InFinBank’нинг соф фойдаси 170 фоизга ошиб, 530,7 млрд сўмга етди. Агробанкда кўрсаткич 32,8 млрд сўмдан 170,6 млрд сўмга кўтарилган. Алоқабанк эса 409,2 млрд сўм соф фойда олиб, ўтган йилги натижасини 58,4 фоизга яхшилади.
Apex Bank ҳам ўтган йилнинг тўққиз ойидаги 52,2 млрд сўмлик зарардан чиқиб, 179 млрд сўм соф фойда қайд этди.
Шу билан бирга, ўнта банкнинг молиявий натижаси ёмонлашган. ANORBANK соф фойдаси 55,7 фоизга камайиб, 104,5 млрд сўмга тушди. Бизнесни ривожлантириш банкида бу кўрсаткич 32,9 фоизга қисқариб, 259,6 млрд сўмни ташкил этди. Ориент Финанс Банкнинг фойдаси 8,7 фоизга, Азия Альянс Банкники эса 13,3 фоизга камайган.
Микрокредитбанк тўққиз ойликни 50,4 млрд сўм, TBC Bank эса 69,6 млрд сўм зарар билан якунлади. Таққослаш учун, ўтган йилнинг мос даврида ушбу банклар тегишлича 90,9 млрд сўм ва 30,3 млрд сўм соф фойда олган эди.
Рейтингдаги қолган 32 та банк фойда қайд этган. AVO bank 455 млн сўм билан энг кам соф фойда олган банк бўлди. Опенбанкнинг фойдаси 1,3 млрд сўмни, Пойтахт банкники эса 2,6 млрд сўмни ташкил этди.
Банклар соф фойдаси ҳақидаги маълумотлар Корпоратив маълумотлар ягона портали ҳамда оператив ҳисоботларга асосланиб, “Ахбор-рейтинг” агентлиги томонидан эълон қилинган.
