Ўзбекистон “Асакабанк”, “Туронбанк” ва “Алоқабанк” хусусийлаштирилишини 2025 йилдан кейинга қолдирди
“Ўзсаноатқурилишбанк”ни хусусийлаштиришни якунлаш эса 2025-2026 йилларга мўлжалланмоқда.
Шунингдек, “Ўзмиллийбанк”, “Агробанк”, “Халқ банки” ва бошқа давлат банкларини 2028 йилгача хусусийлаштириш кўзда тутилмаган.
Ўзбекистон тўртта йирик давлат банкининг хусусийлаштирилишини 2025 йилдан кейинга қолдиради.
Хусусан, “Ўзсаноатқурилишбанк”ни хусусийлаштиришнинг якуний босқичи 2025–2026 йилларга, қолган уч банк — “Асакабанк”, “Алоқабанк” ва “Туронбанк” хусусийлаштируви эса 2026–2027 йилларга мўлжалланган.
Қайд этилишича, “Ўзсаноатқурилишбанк” АТБ, “Асака” АЖ, “Алоқабанк” АТ ва “Туронбанк” АТБдаги давлат улушларини босқичма-босқич хусусийлаштириш режалаштирилган. Бу жараён икки босқичда амалга оширилади: биринчи босқичда — банкларнинг институционал ислоҳоти, яъни фаолиятини трансформация қилиш, иккинчи босқичда эса — давлат акцияларини сотиш.
Шунингдек, “Ўзмиллийбанк” АЖ, “Агробанк” АТБ, “Халқ банки” АТ, “Микрокредитбанк” ва “Бизнесни ривожлантириш банки” АТБни 2026–2028 йилларда хусусийлаштириш режалаштирилмаган.
Бу бешта банк устав капиталларидаги давлат улушини сақлаб қолишдан кўзланган мақсад – банк тизими ислоҳоти давомида аҳолининг молиявий хизматларга бўлган эҳтиёжини қондириш, инвестиция лойиҳаларини қўллаб-қувватлаш ва банк хизматларининг ҳудудий қамровини таъминлашдир.
Маълумот ўрнида, Ўзбекистонда ҳозиргача хусусийлаштирилган энг сўнгги давлат банки — “Пойтахтбанк” бўлиб, у Бирлашган Араб Амирликларининг Bond Investments Limited LLC компаниясига 10 миллион долларга сотилган.
