“Ўзбекфильм”нинг 22,9 млн евро кредит қарзи бор, ер майдонлари эса гаровда — Жаҳонгир Аҳмедов

“Ўзбекфильм” миллий киностудиясининг кредит мажбурияти 22,9 млн еврога етган. Бу ҳақда маданият вазирининг биринчи ўринбосари — Кинематография агентлиги директори Жаҳонгир Аҳмедов маълум қилди.

21 августдаги расмий курс бўйича ушбу сумма қарийб 317 млрд сўмга тенг. Яъни кредит мажбурияти студиянинг ўзини сақлаб туриши учун зарур бўлган йиллик буюртмалар ҳажмидан номинал жиҳатдан 5,3 баравар кўп.

Кредит таъминоти сифатида киностудиянинг мол-мулки, жумладан, ер майдонлари ҳам гаровга қўйилган. Кредитнинг қайси банкдан, қандай муддат ва фоиз ставкасида олингани очиқланмаган.

Бундан ташқари, “Ўзбекфильм”нинг солиқлардан 1 млрд сўмдан ортиқ қарзи тўпланган. Аҳмедовнинг билдиришича, қарздорлик сабаб студия балансидаги 12 та автомобиль 12 кун ичида аукционга чиқарилиши хавфи мавжуд.

Киностудияда ходимларнинг иш ҳақи бўйича ҳам йирик қарздорлик шаклланган. Бироқ унинг аниқ миқдори келтирилмаган.

Агентлик раҳбари “Ўзбекфильм” йилига камида 60 млрд сўмлик буюртма бажармаса, ўз фаолиятини мустақил сақлаб тура олмаслигини қайд этди. Бу студиянинг даромад модели ҳали бозор тамойилларига тўлиқ ўтмагани ва унинг давлат буюртмаларига қарамлигича қолаётганини кўрсатади.

Аҳмедовга кўра, эндиликда студияни фақат қарзлардан чиқариш етарли эмас. “Ўзбекфильм”ни замонавий бошқарувга эга, хусусий инвестиция ва халқаро ҳамкорликни жалб қила оладиган ҳамда ўз маҳсулотини бозорда сотадиган миллий кино компаниясига айлантириш зарур.

Айни пайтда кредитни қайта молиялаштириш, гаровдаги активларни бўшатиш ёки солиқ ва иш ҳақи қарзларини қоплаш бўйича аниқ чоралар эълон қилинмаган. “Ўзбекфильм”нинг молиявий соғломлаштириш дастури қандай манбалар ҳисобидан амалга оширилиши ҳам ҳозирча номаълум.