Nvidia раҳбари Женсен Ҳуанг Хитой жосуси деб гумон қилинаётган аёл билан романтик муносабатда бўлган — FT
АҚШ расмийлари Nvidia бош директори Женсен Ҳуанг Хитой разведкасига алоқадорликда гумон қилинаётган тадбиркор аёл билан романтик муносабатда бўлган, деб ҳисобламоқда. Financial Times бу ҳақда разведка маълумотлари асосида тайёрланган хизмат ёзишмасидан хабардор манбаларга таяниб ёзди. Nvidia аввалроқ улар ўртасидаги алоқаларни одатий иш муносабатлари сифатида изоҳлаган.
Гап Сингапурдаги Megaspeed компанияси билан боғлиқ раҳбар Алис Ҳуанг ҳақида бормоқда. Нашр манбаларига кўра, АҚШ разведкаси уни Хитой Давлат хавфсизлик вазирлиги жосуслик учун ёллаган, деб ҳисоблайди. Женсен Ҳуанг билан эҳтимолий романтик муносабат ҳақидаги даъво ҳам шу разведка маълумотларига асосланган ҳужжатда қайд этилган.
Масала АҚШ Конгресси эътиборига ҳам тушган. Вакиллар палатасининг ташқи ишлар, Хитой ва разведка масалалари бўйича учта қўмитаси раислари Ҳуангдан Алис Ҳуанг билан алоқалари ҳамда Nvidia’нинг хорижий жосусликдан ҳимояланиш чораларини тушунтиришни сўраган.
Қўмиталар 18 ноябрь куни ёпиқ брифинг ўтказишни таклиф қилган. Nvidia раҳбаридан 11 ноябргача ушбу санани тасдиқлаш ёки бошқа кунни таклиф этиш сўралган.
Nvidia эса Ҳуанг ҳар йили минглаб мижоз компаниялар раҳбарлари билан учрашишини, Алис Ҳуанг билан мулоқотлари ҳам одатий иш фаолиятининг бир қисми эканини билдирган. Компания минтақавий булут хизматлари мижозларига оддий тижорий маълумотлар берилишини, махфий технологик сирлар ёки миллий хавфсизликка оид ахборот тақдим этилмаслигини таъкидлаган.
Хитой Ташқи ишлар вазирлиги ҳам аввалги жосуслик ҳақидаги хабарларни рад этган. Вазирлик вакили Гуо Жиакун 30 октябрь куни уларни асоссиз тахминлар ва Хитойни обрўсизлантиришга уриниш деб атаган.
Даъволар АҚШнинг илғор сунъий интеллект чипларини Хитойга етказиб беришга қўйган чекловлари фонида пайдо бўлмоқда. Megaspeed ушбу чекловларни четлаб ўтишга ёрдам берган бўлиши мумкинлиги юзасидан текширувлар эътиборига тушган. Nvidia эса ўз текширувида чиплар ноқонуний равишда Хитойга йўналтирилганига далил топмаганини билдирган.
Сингапур Ички ишлар вазирлиги 31 октябрдаги баёнотида Megaspeed бўйича текширув давом этаётганини тасдиқлаган. Айни пайтда вазирлик Алис Ҳуангнинг Хитой разведкаси ёки Женсен Ҳуанг билан алоқалари юзасидан Сингапур ҳукумати текширув ўтказгани ҳақидаги хабарларни рад этган.
