Nvidia — бозор капиталлашуви $4 трлнга етган илк компания
9 июль куни чип ишлаб чиқарувчиси Apple томонидан ўрнатилган аввалги рекордни янгилаб, $4 трлнлик бозорлашувга эга бўлган илк компанияга айланди. Таққослаш учун, Nvidia’нинг бозор қиймати ҳозирда Google ва Meta компанияларининг умумий капиталлашувига тенг.
Калифорниянинг Silcon водийсида жойлашган чип ишлаб чиқарувчи Nvidia компанияси бозор капиталлашуви $4 триллиондан ошган тарихдаги биринчи компанияга айланди.
Nvidia қийматининг бу даражада кескин ошишига сабаб — АҚШ техногигантлари ўртасида кучайиб бораётган сунъий интеллект (AI) ва маълумот марказларини қуриш бўйича рақобатдир. Google, OpenAI, Meta каби компаниялар ўз AI моделларини ўқитишда айнан Nvidia чипларидан кенг фойдаланмоқда. Бу ҳолат, ўз навбатида, глобал миқёсдаги AI ваҳимасини юзага келтирмоқда.
2025 йил 9 июль куни Nvidia акциялари 2,5% га ошди ва компаниянинг бозор қиймати $4 триллиондан ошиб, илгари Apple томонидан ўрнатилган $3,9 триллионлик рекордни ортда қолдриди. Бироқ кун якунига келиб акциялар нархи $162.88 атрофида ёпилиб, компания капиталлашуви $3,97 триллионга тушди.
Умуман олганда, Nvidia акциялари 4 апрель куни Трампнинг глобал бож ставкалари ҳақидаги баёнотларидан кейин силкинишлар кузатилганидан бери 70% дан ортиқ ўсди. Йил бошидан буён эса акциялар қарийб 20% га ошган, сўнгги беш йилда эса ақл бовар қилмас даражада — 1500% га кўтарилган.
Гарчи кун якунида компания бозор қиймати $4 триллиондан бироз пастга тушган бўлса-да, ушбу марранинг забт этилиши сунъий интеллект атрофидаги ҳаяжоннинг технология соҳасида қандай улкан силкинишларга сабаб бўлаётганини яққол кўрсатади.
Бу жараён 2007 йилда Apple асосчиси Стив Жобс томонидан биринчи iPhone тақдим этилган даврдан кейинги энг катта технологик бурилиш сифатида баҳоланмоқда. Бугунги кунга келиб Nvidia, ҳаттоки, Апплеъни ҳам ортда қолдириб, деярли $900 миллиардга кўпроқ қийматга эга бўлиб турибди.
Маълумот ўрнида, Apple илгари бозорда $1 триллион, $2 триллион ва $3 триллион қийматга биринчи бўлиб эришган компания саналади.
