Мурод Назаров ва AVO Bank микромолия секторига кирди

Марказий банк яна учта микромолия ташкилотини рўйхатдан ўтказди. Бу ҳақда регуляторнинг матбуот хизмати хабар берди.

Марказий банк бошқарувининг 156-, 157- ва 158-сонли қарорларига мувофиқ, микромолия ташкилотлари реестрига ADL Молия, Prizma Капитал ва Avo Finance компаниялари киритилди. Очиқ маълумотларига кўра, ушбу учала компания ҳам жорий йилнинг октябрь ойида ташкил этилган.

ADL Moliya компаниясининг устав фонди 2,5 млрд сўмни ташкил этади. Компания молиявий лизинг соҳасида фаолият юритади. Унинг ягона таъсисчиси Муроджон Тоҳиржонович Назаров бўлиб, у Murad Buildings, NRG ҳамда қатор қурилиш ва архитектура компанияларидаги улушларга эгалик қилади.

Prizma Kapital ҳам октябрь ойида Қўқон шаҳрида ташкил этилган. Компания "кредитлашнинг бошқа турлари" йўналишида фаолият олиб боради. 52 млрд сўмлик устав капитали тенг улушларда шаклланган бўлиб, таъсисчилар — Нурафшон метан Савдо асосчиси Маҳмуд Аҳмедов ва Нозимжон Жабборов ҳисобланади.

Avo Finance эса AVO.uz банк холдингининг шўба корхонаси ҳисобланади. Ушбу холдинг таркибига 2023 йилда хусусийлаштирилган AVO bank ҳам киради. Ҳолдинг Руслан Адилбаев ва Fonte Hedge Fund ОEIC’га тенг улушларда тегишли.