Молдова Миллий банки собиқ раҳбари SQB кенгаши раиси этиб тасдиқланди
Сержиу Чокля “Ўзсаноатқурилишбанк” кенгаши раиси этиб тасдиқланди. У аввал Франциянинг BNP Paribas банк гуруҳида раҳбарлик лавозимларида ишлаган, 2016–2018 йилларда эса Молдова Миллий банкини бошқарган.
“Ўзсаноатқурилишбанк” кенгашининг мустақил аъзоси Сержиу Чокля банк кенгаши раиси этиб тасдиқланди. Бу ҳақда банкнинг 15 октябрдаги кенгаш йиғилиши баённомасидан кўчирмада маълум қилинган.
Йиғилишда кенгашнинг 11 нафар аъзоси иштирок этган. Чокля ўз номзоди бўйича овоз беришда қатнашмаган, қолган 10 нафар аъзо эса уни бир овоздан маъқуллаган.
Чокля BNP Paribas гуруҳида иқтисодий таҳлил ва корпоратив молия йўналишларида ишлаган. 2000–2007 йилларда Парижда Марказий ва Шарқий Европа бўйича корпоратив молия бўлинмасида раҳбарлик лавозимларини эгаллаган. 2008–2015 йилларда Москвада корпоратив молия департаментини бошқарган. Унинг тажрибаси компанияларни сотиб олиш ва бирлаштириш, хусусийлаштириш ҳамда капитал бозори билан ишлашни қамраб олади.
2016 йил апрелда Молдова Миллий банки раҳбари сифатида иш бошлаган ва 2018 йил ноябрь охиригача шу лавозимда фаолият юритган. Унинг раҳбарлик даври мамлакат банк тизимида мулкчилик шаффофлиги ва назоратни кучайтиришга қаратилган ислоҳотларга тўғри келган.
У Молдова Иқтисодий билимлар академияси ҳамда Париждаги Пантеон–Ассас университетида таҳсил олган. Румин, француз, инглиз ва рус тилларини билади.
