Mobiuz’даги 100 фоизлик давлат улушини хусусийлаштириш бошланди

Давлат активларини бошқариш агентлиги Universal Mobile Systems (Mobiuz) компаниясининг устав капиталидаги 100 фоиз давлат улушини хусусийлаштириш жараёнини бошланганини маълум қилди. 

Битим бўйича етакчи стратегик ва молиявий маслаҳатчи сифатида “Rothschild& Co” инвестиция банки жалб этилган. Молиявий маслаҳатчи ҳамда молиявий, солиқ ва юридик экспертизани (“vendor due diligence”) ўтказиш бўйича KPMG компанияси, активни мустақил баҳоловчи сифатида эса Deloitte компанияси иштирок этмоқда.

Ушбу жараён халқаро очиқ савдо шаклида ташкил этилади ва унда маҳаллий ҳамда хорижий инвесторлар тенг ҳуқуқли асосда иштирок этишлари мумкин.

Хусусийлаштириш жараёни уч босқичда амалга оширилади: биринчи босқичда инвесторлар томонидан активни сотиб олишга қизиқиш билдириш (Expression of Interest), иккинчи босқичда мажбурий бўлмаган таклифлар (Non-Binding Offer – NBO), ва учинчи босқичда эса мажбурий таклифлар (Binding Offer – BO) қабул қилинади.

Биринчи босқичда талабгорлар ариза билан бир қаторда қуйидаги ҳужжатларни тақдим этишлари керак: 

• Рўйхатдан ўтганлик сертификати
• Компания фаолият йўналиши
• Устав капиталида 5 фоиздан ортиқ улушга эга бўлган акциядорлар  
• Якуний бенефициарлар ҳақида маълумот
• Сўнгги уч йилга оид молиявий ҳисоботлар

Аризалар молиявий имкониятлар, қонуний чекловларнинг мавжуд эмаслиги ва Ўзбекистоннинг жиноий фаолиятдан тушган даромадларни легаллаштиришга қарши қонунларига мувофиқлик мезонлари асосида кўриб чиқилади.

Шунингдек, талабгорлар ва уларнинг акциядорлари давлат компаниялари бўлмаслиги, Европа Иттифоқи, АҚШ ёки халқаро молиявий институтлар томонидан санкциялар рўйхатига киритилмаган бўлиши, ҳамда санкцияларга қарши фаолиятларда иштирок этмаган бўлиши лозим.

Аризалар 2025 йил 1 август куни соат 18:00 гача ўзбек, рус ёки инглиз тилларида қуйидаги электрон манзилларга юборилиши керак: oleg.pushkarev@rothschildandco.com, fara.babayev@rothschildandco.com ва ssandykbayeva@kpmg.com. Биринчи босқич якунлангач, кейинги босқичга ўтган талабгорлар рўйхати шакллантирилади ва улар индивидуал тартибда хабардор қилинади.

Mobiuz ҳақида

Universal Mobile Systems – Mobiuz бренди остида GSM, UMTS ва 4G LTE технологияларида мобил алоқа ва мобил интернет хизматларини кўрсатади. 2024 йилда компаниянинг соф тушуми 2,086 триллион сўмни ташкил этган, абонентлар сони эса 7,8 миллион нафарга етган.

UMS дастлаб Ўзбекистон ҳукумати ва Россиянинг МТС компанияси ўртасидаги келишув асосида ташкил этилган. 2016 йилда МТС ўз улушини сотган. 2018 йилдан компания Рақамли ишонч жамғармасига тегишли бўлган. Жамғарма 2021 йилда тугатилгач, UMS компаниясининг эгалик ҳуқуқи Ахборот технологиялари ва коммуникацияларини ривожлантириш вазирлигига ўтган.