Korzinka’га янги бош директор тайинланди
Педро Мартиньо 2 сентябрдан Korzinka’нинг бош директори сифатида иш бошлади. У чакана савдо соҳасида 30 йилдан ортиқ тажрибага эга бўлиб, халқаро танлов орқали танланган. Шу тариқа компаниянинг қарийб бир йил давом этган янги раҳбар излаш жараёни якунланди.
Korzinka’ Директорлар кенгаши Педро Мартиньони компаниянинг янги бош директори этиб тайинлади.
У Тошкентга кўчиб келган ва 2026 йил 2 сентябрдан ўз вазифаларини бажаришга киришган. Бу ҳақда компания матбуот хизмати хабар берди.
Мартиньо озиқ-овқат чакана савдоси соҳасида 30 йилдан ортиқ тажрибага эга. У Польша, Португалия, Болтиқбўйи мамлакатлари ва Озарбайжондаги чакана савдо компанияларида ишлаган.
Янги раҳбар фаолиятининг катта қисмини Польшанинг Eurocash Group компаниясида ўтказган. У ерда дўконлар тармоғини кенгайтириш, логистика ва технологияларга инвестиция киритиш, шунингдек, компаниянинг рақамли йўналишларини ривожлантиришда иштирок этган.
Мартиньо яқин вақтгача Eurocash таркибидаги Польшанинг онлайн озиқ-овқат савдоси компанияси Frisco.pl’га вақтинча бош директор сифатида раҳбарлик қилган. Унинг тажрибаси, шунингдек, мерчандайзинг, таъминот занжири, электрон тижорат ва дўконлар фаолиятини бошқариш йўналишларини қамраб олади.
Korzinka’нинг аввалги бош директори Руд Педерсен 2025 йил сентябрида оиласига кўпроқ вақт ажратиш истагини билдириб, лавозимидан кетган эди.
Шундан кейин бош директорнинг биринчи ўринбосари Акмал Асадов компанияни вақтинча бошқариб келган. Korzinka’ ўша пайтда янги раҳбарни халқаро танлов орқали излашни бошлаганини маълум қилганди.
