Korea Development Bank KDB Bank Uzbekistan’ни сотиши мумкин — ОАВ
Жанубий Кореянинг давлатга қарашли Korea Development Bank’и Ўзбекистондаги шўба банки — KDB Bank Uzbekistan’ни сотиш имкониятини кўриб чиқмоқда. Потенциал харидорлар орасида Ўзбекистон бозорига киришга тайёрланаётган Shinhan Bank ва Hana Bank тилга олинмоқда. Бироқ KDB ҳозирча сотув бўйича аниқ қарор қабул қилинмаганини билдирган.
Korea Development Bank (KDB) хориждаги бизнес тармоғини оптималлаштириш доирасида Ўзбекистондаги шўба банкини сотиш имкониятини кўриб чиқмоқда. Бу ҳақда Жанубий Кореянинг Maeil Business Newspaper нашри молия секторидаги манбаларга таяниб хабар берди.
Нашрга кўра, KDB ҳозир хорижда 7 та шўба компания, 12 та филиал ва 6 та ваколатхона — жами 25 та тузилмага эга. Вьетнамда очилиши кутилаётган Ханой филиали билан уларнинг сони 26 тага етади. Банк айрим бозорлардаги фаолиятини қисқартириш, бирлаштириш ёки активларни сотиш орқали хорижий тармоқ самарадорлигини ошириш вариантларини кўриб чиқмоқда.
Ўзбекистон сотилиши мумкин бўлган йўналишлардан бири сифатида тилга олинган. Maeil Business Newspaper манбасининг айтишича, KDB хорижий портфелини қайта кўриб чиқиш жараёнида Ўзбекистондаги шўба банкини сотиш вариантини ҳам ўрганмоқда.
Потенциал харидор сифатида, аввало, Ўзбекистон бозорига киришга тайёрланаётган Жанубий Корея банклари кўрилиши мумкин. Ҳозир Shinhan Bank Ўзбекистонда маҳаллий юридик шахс ташкил этишга, Hana Bank эса ваколатхона очишга тайёргарлик кўрмоқда.
Инвестиция-банк сектори вакилига кўра, KDB Ўзбекистондаги бизнес бўйича Shinhan Bank ва Hana Bank’нинг қизиқишини ҳам ўрганган. Бироқ банкнинг ўзида активни сотишга қарши фикрлар ҳам борлиги қайд этилган.
Korea Development Bank эса нашрга ҳозирча ҳеч қандай аниқ қарор қабул қилинмаганини билдирган. Шу сабабли KDB Bank Uzbekistan’нинг сотилиши ҳозирча тасдиқланган битим эмас, балки кўриб чиқилаётган вариант ҳисобланади.
KDB Bank Uzbekistan’нинг 86,32 фоизи Корея банкига тегишли
KDB Bank Uzbekistan’нинг назорат пакети Korea Development Bank’га тегишли. Банкнинг расмий маълумотларига кўра, KDB устав капиталининг 86,32 фоизига эгалик қилади.
Яна 10,31 фоиз Ўзбекистон Миллий банкига, 3,37 фоиз Туронбанкка тегишли. Korea Development Bank’нинг ўзи эса 100 фоиз Жанубий Корея ҳукуматига қарашли.
Банк Ўзбекистонда 1997 йилда UzDaewoo Bank номи билан ташкил этилган. 2006 йилда Korea Development Bank кириб келгач, у UzKDB Bank номини олган. Кейинчалик KDB RBS Uzbekistan’даги назорат пакетини сотиб олди ва 2013–2014 йилларда икки тузилма KDB Bank Uzbekistan номи остида бирлаштирилди.
Шу тариқа, Korea Development Bank Ўзбекистон бозорида қарийб 20 йилдан бери асосий инвестор сифатида фаолият юритиб келмоқда.
KDB’нинг хориждаги тармоғини қайта кўриб чиқиши Жанубий Кореяда давлат ташкилотлари самарадорлигини ошириш сиёсати фонида амалга оширилмоқда. Maeil Business Newspaper’га кўра, банк ўсиш имконияти чекланган айрим хорижий тузилмаларни қисқартириш ёки сотиш, истиқболли бозорларда эса аксинча фаолиятини кенгайтиришни кўриб чиқмоқда.
