Ипотека-банк бошқарувини икки нафар раис ўринбосари тарк этмоқда
Ипотека-банк OTP Group бошқарувида бир вақтнинг ўзида икки топ-менежер Иракли Элашвили ва Максим Биков ўз лавозимини тарк этмоқда.
Улар банкнинг корпоратив бизнес ва операцион йўналишларига раҳбарлик қилиб келган.
Энди Биковнинг вазифалари Дмитрий Волчекка ўтказилади, Элашвили ўрнига эса янги раҳбар танлов асосида изланади.
Ипотека-банк OTP Group бошқаруви таркибида ўзгаришлар амалга оширилмоқда. Банк бошқаруви раисининг ўринбосарлари Иракли Элашвили ва Максим Биков ўз лавозимларини тарк этади.
Иракли Элашвили 2025 йилдан буён бошқарув раисининг ўринбосари ҳамда Корпоратив банк хизматлари ва бозор инструментлари блоки раҳбари сифатида ишлаб келган. У корпоратив бизнесни ривожлантириш, шунингдек, йирик мижозлар ва ҳамкорлар билан муносабатлар учун масъул бўлган.
Банк корпоратив банк хизматлари йўналишига масъул янги бошқарув раиси ўринбосарини танлаш учун яқин вақт ичида танлов эълон қилишини билдирди. Ҳозирча ушбу лавозимга ким тайинланиши маълум эмас.
Максим Биков эса 2025 йил апрелидан буён бошқарув раисининг ўринбосари ва Операцион блок раҳбари сифатида фаолият юритган. Унинг ваколатларига банкнинг операцион фаолияти ва ички жараёнлар самарадорлигини бошқариш кирган.
Биковнинг вазифалари бошқарув раисининг бошқа ўринбосари Дмитрий Волчекка топширилди.
Ипотека-банк Элашвили ва Биковнинг банкни тарк этиш сабабларини очиқламаган. Банк уларнинг фаолияти давомида корпоратив ва операцион йўналишларни ривожлантиришга қўшган ҳиссасини қайд этган.
Ипотека-банк 2023 йилдан буён Венгриянинг OTP Group таркибига киради. OTP Bank Ўзбекистон ҳукумати билан тузилган битим асосида банкнинг назорат пакетини сотиб олган.
