Илон Маскнинг xAI компанияси юз минглаб Grok чатбот суҳбатларини ошкор қилган — Forbes
Ҳозирда Google’да 370 мингдан ортиқ суҳбат индексланган бўлиб, улар орасида шахсий маълумотлар, пароллар, ҳужжатлар ва ҳатто ноқонуний кўрсатмалар ҳам бор.
Бу каби ҳолат бироз аввал Open AI’нинг ChatGPT сунъий интеллекти билан ҳам содир бўлган эди.
Илон Маскнинг сунъий интеллект компанияси xAI ўз чатботи Grok билан фойдаланувчилар ўртасида бўлган юз минглаб суҳбатларни интернетга чиқаргани аниқланди. Бу ҳақда Forbes хабар бермоқда.
Энг хавотирлиси, бу суҳбатлар кўпинча фойдаланувчиларнинг хабарисиз ва рухсатисиз эълон қилинган.
Суҳбатлар қандай қилиб интернетга чиқиб кетди?
Grok’да фойдаланувчилар суҳбатни дўстлари билан улашиши учун “шаре” тугмаси мавжуд. Тугма босилганда махсус ҳавола яратилади ва уни электрон почта, ижтимоий тармоқ ёки SMS орқали юбориш мумкин. Аммо муаммо шундаки, бу ҳаволалар нафақат улашилган одамга, балки Google, Bing ва DuckDuckGo каби қидирув тизимларига ҳам очиқ бўлади. Натижада, суҳбатлар бутун интернет учун изланадиган ва ўқиладиган ҳолга келиб қолган.
Google қидирув тизими бугунги кунда 370 мингдан ортиқ Grok суҳбатларини индекслаб бўлган.
Нималар ошкор бўлди?
Forbes журналистлари ўрганишлари давомида турли мазмундаги суҳбатларга дуч келган:
- Оддий топшириқлар – твит ёзиш, матн қисқартириш, бизнес маслаҳати олиш.
- Шахсий суҳбатлар – тиббиёт, психология ҳақидаги саволлар, фойдаланувчиларнинг исм-шарифлари, шахсий маълумотлари ва ҳатто пароллари.
- Юкланган ҳужжатлар – суратлар, Excel жадваллари, матнли файллар.
- Қоидабузар сўровлар – наркотик моддалар тайёрлаш, зарарли дастур ёзиш, бомба ясаш бўйича кўрсатмалар. Ҳатто Grok’дан Илон Маскни ўлдириш режаси ҳақида йўриқнома олган фойдаланувчилар ҳам бўлган.
Бу суҳбатларнинг барчаси, “улашиш” тугмаси туфайли, очиқ веб-саҳифа сифатида Grok сайтидан чиқиб, қидирув тизимларига тушиб қолган.
Машҳур фойдаланувчилар ҳам алданиб қолган
Британиялик журналист Эндрю Клиффорд Grok’дан газета сарлавҳаларини қисқартириш ва твит ёзишда фойдаланиб келган. У суҳбатларининг Google’да кўринаётганини билмаганди. Forbes’га берган изоҳида у “Бироз ноқулай бўлди, лекин махфий нарсалар йўқ эди” деб айтган ва эндиликда Google Gemini AI’га ўтганини билдирган.
Худди шундай, Allen Institute for AI олими Нейтан Ламбер ҳам Grok’дан блог постларини қисқартириб жамоаси билан бўлишган. Лекин суҳбатларининг Google’да чиқиб қолгани ҳақида Forbes’дан эшитиб, жуда ҳайратда қолганини айтган.
Бу каби вазият бироз олдин OpenAI билан ҳам кузатилган. ChatGPT фойдаланувчилари ҳам суҳбатларининг Google’да чиқиб қолганини пайқашган. Аммо OpenAI тезда сиёсатини ўзгартирди ва индекслашни тўхтатди. Компания бу ҳолатни “тажрибавий хато” деб тан олди.
Шу пайтда Илон Маск Grok’нинг афзаллигини мақтаниб “бизда бундай функция йўқ” деган эди. Энди эса Grok’да ҳам “улашиш” функцияси борлиги ва суҳбатлар оммага чиқиб кетаётгани тасдиқланди.
