Гарвард ва Стенфорд университетлари билан ҳамкорликда ёшлар бизнесга ўқитилади
Дастур доирасида 40 минг нафар ёш бизнес асосларига ўқитилади, энг яхши 1 минг лойиҳа учун эса уч йил муддатга 200 млн сўмгача 7 фоизлик имтиёзли ссуда ажратилади. Шунингдек, ҳар йили 100 та истиқболли лойиҳа бренд даражасига олиб чиқилиши учун 1 млрд сўмгача маблағ йўналтирилади.
Аввалроқ Кўксарой қароргоҳида Президент Шавкат Мирзиёевнинг ёшлар билан учрашуви бўлиб ўтаётгани хабар қилинган эди.
Унда ёшларни тадбиркорликка кенг жалб этиш, уларнинг бизнес ташаббусларини қўллаб-қувватлаш ва халқаро тажрибани жорий этиш масалалари муҳокама қилинди.
Таъкидланишича, Гарвард, Стенфорд, Лондон иқтисодиёт мактаби каби нуфузли олийгоҳлар илғор тажрибалар асосида ёшларни тадбиркорликка ўқитишда ҳамкорлик қилишга тайёр..
Ёшлар ишлари агентлигига ушбу хорижий олийгоҳлар билан ҳамкорликда камида 40 минг нафар ёшни бизнес юритиш асосларига ўқитишни назарда тутувчи “Янги авлод тадбиркорлари” дастурини йўлга қўйиш топширилди.
Дастур доирасида энг яхши натижа кўрсатган 1 минг нафар ёшнинг лойиҳасига уч йил муддатга, 200 миллион сўмгача 7 фоизлик имтиёзли ссуда ажратилади.
Шунингдек, ҳар йили “Ёш тадбиркорлар” танлови ўтказилиб, энг истиқболли 100 та лойиҳа бренд даражасига олиб чиқилади. Бунинг учун “Ёшлар венчурс” жамғармаси ҳисобидан 1 миллиард сўмгача маблағ ажратилиши белгиланди.
Банкларга биттадан консалтинг компания ташкил этиш вазифаси юклатилди. Жорий йилда 50 минг нафар ёш тадбиркорга бизнес-режа ишлаб чиқишда кўмаклашиш ҳамда тегишли харажатларни қоплаб бериш режалаштирилган. Бундан ташқари, йирик савдо тармоқлари вакиллари ва малакали мутахассислар жалб этилиб, камида 20 минг нафар ёш тадбиркорлик кўникмаларига ўқитилади.
Шу билан бирга, 1 мартдан бошлаб янги иш бошлаётган ёш тадбиркорларнинг инфратузилмага уланиш билан боғлиқ давлат хизматлари харажатлари Ёшлар тадбиркорлиги жамғармаси маблағлари ҳисобидан қоплаб берилади.
