Эндиликда фуқаролар тўлаган солиқларининг қаерга сарфланишини кўриши мумкин бўлади

28 ноябрь куни “Солиқларнинг йиғилувчанлик даражасини ошириш ва фаол солиқ тўловчиларни рағбатлантириш чора-тадбирлари тўғрисида"ги президент қарори қабул қилинди.

2026 йил 1 январдан “Очиқ бюджет” порталида янги модуль ишга туширилади. Унда аҳолининг тўлаган солиқлари ҳисобидан амалга оширилаётган бюджет харажатлари бўйича маълумотлар акс эттирилади. Модулда жисмоний шахслар томонидан маълум даврда тўланган даромад солиғи, мол-мулк ва ер солиғи суммалари, шунингдек, ушбу маблағлар эвазига давлат бюджетидан бажарилган харажатлар доимий равишда эълон қилиб борилади. Тизимга OneID орқали кириш мумкин бўлади.

2026 йил 1 февралдан “Очиқ бюджет” порталида овоз берувчилар портретини ўз ичига олган маълумотлар базаси шакллантирилади.

Солиқ қўмитасига бир ой муддатда Иқтисодиёт ва молия вазирлиги техник талабномалари асосида, шахсга доир маълумотларни ҳимоя қилиш талаблари доирасида, солиқ маълумотларининг порталда тўғридан-тўғри шаклланишини таъминлаш топширилди. Ушбу маълумотлар фақат фуқаронинг ўзи учун кўринади.

Шунингдек, қўмита ҳар йили 1 февралга қадар энг яхши солиқ тўловчи маҳаллалар рўйхатини шакллантириб, 10 февралгача расмий сайтида эълон қилиб бориши лозим.

Марказий банкка жисмоний шахсларнинг солиқ қарзлари ҳақида маълумотларни банк ва тўлов ташкилотлари мобил иловалари орқали етказишда Солиқ қўмитасига амалий ёрдам бериш вазифаси юклатилди. Қарздорлик ҳақидаги маълумотлар иловалар асосий саҳифасида доимий кўриниб туради.

Бундан ташқари, 2026 йилдан бошлаб жисмоний шахсларнинг кўчмас мулкни ижарага беришдан олган даромадлари бўйича тўланган солиқ тўлиқ ҳажмда мулк жойлашган туман ёки шаҳар маҳаллий бюджетига йўналтирилади.