Электрон пул ўтказмаларидаги янги тартиблар мижозларга қийинчилик туғдирмайди — Марказий банк
Марказий банк тўлов тизимлари ва электрон пуллар соҳасидаги ички назорат қоидаларига киритилган ўзгартишлар юзасидан билдирилаётган фикрларга расмий изоҳ берди.
Марказий банк жиноий фаолиятдан олинган даромадларни легаллаштириш ва терроризмни молиялаштиришга қарши курашиш мақсадида тўлов тизимлари операторлари, электрон пуллар тизими операторлари ва тўлов ташкилотлари учун ички назорат қоидаларига киритилган ўзгартириш ва қўшимчалар юзасидан билдирилаётган фикрлар бўйича расмий изоҳ берди.
Мижоз учун нима ўзгаради?
Марказий банкнинг таъкидлашича, ушбу талаб мижозларга қўшимча қийинчилик туғдирмайди. Чунки:
- Маълумотлар фақат тўлов ташкилотлари ва банклар ўртасида алмашилади;
- Мижозлардан қайта идентификация ёки ҳужжат тақдим этиш талаб этилмайди;
- Аккаунт очилишида тақдим этилган мавжуд маълумотлар асосида автоматик тарзда маълумот узатилади.
Яъни, мижоз ўзининг электрон пул ўтказмаларида ҳеч қандай қўшимча ҳаракат амалга ошириши шарт эмас.
Бу тартиб, аввало, электрон пул ўтказмалари орқали амалга оширилиши мумкин бўлган ноқонуний фаолиятларнинг олдини олиш, молиявий операцияларда шаффофликни таъминлаш ва электрон тўлов тизимида хавфсизликни мустаҳкамлашга хизмат қилади.
Марказий банкнинг таъкидлашича, мазкур чоралар жаҳон стандартларига мос равишда ишлаб чиқилган бўлиб, мамлакатда молиявий барқарорлик ва хавфсизликни таъминлашда муҳим аҳамиятга эга.
