Доналд Трамп АҚШда ўзининг смартфон ва мобил хизмат брендини ишга туширди
Смартфон T1 Phone деб номланади ва унинг нархи $499 этиб белгиланган. Қурилма ҳозирда $100 миқдоридаги олдиндан тўлов билан буюртма қилиш учун мавжуд.
Бундан ташқари, Trump Mobile мобил алоқа хизмати ҳам тақдим этилган бўлиб, у ойига $47.45 турадиган “47-тариф” режасини ўз ичига олади.
16 июнь куни АҚШ президенти Доналд Трампнинг бизнес империясини бошқарувчи Trump Organization компанияси янги мобил алоқа хизмати ва мобил телефон — Trump Mobile’ни ишга туширганини эълон қилди. Бу ҳақда USA Today нашри хабар берди.
Trump Mobile ўзининг асосий тариф режасини “47-тариф” деб номлаган. Бу режа ойига $47.45 туради ва Трампнинг биринчи ҳамда иккинчи президентлик муддатларига ишора қилади. Тариф фойдаланувчиларга чексиз қўнғироқлар, SMS ва мобил интернетдан фойдаланиш имкониятини тақдим этади. Ундан ташқари, 100 та давлатга халқаро қўнғироқлар бепул, ҳарбийлар ва уларнинг оилалари учун эса узоқ масофали қўнғироқлар имтиёзли тарзда тақдим этилади.
Хизматлар қаторига 24/7 автомобиль йўли ёрдам хизмати, телемедицина хизматлари (виртуал тиббий маслаҳатлар, руҳий саломатлик ёрдами ва дори-дармон буюртмаси) ҳам киритилган.
Trump Mobile, шунингдек, Android операцион тизимида ишловчи T1 номли янги смартфонни ҳам тақдим этади.
T қурилмаси Android 15 тизимида ишлайди, 256 GB ички хотира ва 12 GB тезкор хотирага эга. Телефон юзни аниқлаш ва бармоқ изи орқали блокдан чиқариш функциялари, USB-C порти ҳамда 3.5 мм қулоқчин улагичи билан жиҳозланган. Қурилманинг чакана нархи $499 этиб белгиланган бўлиб, харидорлар уни $100 олдиндан тўлов эвазига ҳозирданоқ буюртма қилишлари мумкин. Расмий чиқиш санаси эса ҳали эълон қилинмаган.
Trump Mobile хизматлари ва қурилмалари тўлиқ АҚШ ҳудудида ишлаб чиқарилади ва бошқарилади. Trump Organization витсе-президенти Эрик Трампнинг айтишича, компания хориждаги қўнғироқ марказларидан фойдаланмайди, балки барча мижозларга Миссури штатининг Ст. Лоуис шаҳридаги марказ орқали хизмат кўрсатади.
