Банкларда кредитларнинг қандай турлари мавжуд?
Кредит олиш қўшимча молиявий имконият ва ўз навбатида маъсулият ҳам ҳисобланиб, унинг бешта асосий турини кўрсатиш мумкин.
Кредит — бу молия ташкилотлари томонидан маълум миқдордаги маблағни вақтинча фойдаланиш учун қарзга бериш жараёни. Кредит олувчи белгиланган муддатда асосан асосий қарзни ва унга қўшимча равишда фоиз тўлаши зарур. Кредитлар турли мақсадлар, масалан, уй-жой сотиб олиш, автомобиль хариди, бизнесни ривожлантириш ёки шахсий эҳтиёжларни қоплаш учун ишлатилади. Кредит турлари асосан 5 та бўлиб, ҳар бири аниқ мақсадга йўналтирилган бўлади.
Микроқарз
Микроқарз – бу кичик миқдордаги молиявий маблағ бўлиб, шахсий эҳтиёжларни қондириш, кутилмаган харажатларни қоплаш ёки тадбиркорлик фаолиятини молиялаштириш учун ажратилади. Ушбу молиявий восита асосан молиявий имкониятлари чекланган кишилар ва кичик бизнес эгаларига мўлжалланган бўлиб, уни олиш шартлари одатда енгилроқ бўлади.
Мавзуга доир: Микроқарз нима ва уни олишда қайси жиҳатларга эътибор бериш керак?
Автокредит
Автокредитлар янги ёки ишлатилган автомобиль харид қилишни режалаштирганлар учун мўлжалланган. Кредит муддати давомида автомобиль гаров сифатида қолади. Одатда дастлабки тўлов талаб этилади ва тўловлар бир неча йилга бўлиб берилади. Автокредитнинг оммабоплиги шахсий транспорт воситасига эга бўлишни истаганлар сонининг ортиши билан боғлиқ.
Таълим кредити
Таълим кредити олий таълим олишни хоҳлаган ёшлар учун муҳим молиявий ёрдам воситаси ҳисобланади. Бу кредит туридан фойдаланиш орқали талабалар контракт тўловларини амалга ошириши мумкин. Имтиёзли давр мавжуд бўлиб, асосий қарзни тўлаш ўқиш муддати давомида кечиктирилади. Таълим кредити ҳозирда аёллар учун фоизсиз, эркаклар учун эса Марказий банк фоиз ставкасида (ҳозирда 13,5%) ажратилади. Марказий банк фоиз ставкаси ўзгарса, кредит фоиз ставкаси ҳам ўзгаради.
Истеъмол кредити
Истеъмол кредитлари – кундалик эҳтиёжларни қондириш учун ажратиладиган кредит тури бўлиб, маиший техника, электроника ёки бошқа зарур товарларни харид қилиш имконини беради. Бу кредитнинг афзаллиги – нисбатан қисқа муддатли бўлиши ва тез расмийлаштирилишидадир.
Ипотека кредити
Ипотека кредитлари узоқ муддатли ва йирик молиявий мажбурият бўлиб, уй-жой сотиб олишни хоҳлаган аҳоли учун ажратилади. Кўчмас мулк кредит муддати давомида гаров вазифасини бажаради. Кредит муддати одатда 10-20 йилга мўлжалланган бўлиб, маълум дастлабки тўлов талаб қилинади. Ўз уйига эга бўлишни орзу қилганлар учун ипотека кредити энг мақбул молиявий ечимлардан бири саналади.
Мавзуга доир: Кредит олишдан аввал нималарга эътибор бериш керак?
