Банк иловалари орқали олтин сотиб олиш тартиби белгиланди

Банклар томонидан қимматбаҳо металлар билан операцияларни амалга ошириш тартиби белгиланди. Бу ҳақда Марказий банк матбуот хизмати хабар берди.

Ҳужжатга кўра, барча тижорат банклари, шу жумладан микромолия банклари, қимматбаҳо металлар билан операцияларни ушбу янги тартибга мувофиқ амалга оширадилар.

Эндиликда жисмоний ва юридик шахслар олтин қуймалар, шунингдек, рақамли (жисмоний бўлмаган) олтин ва кумушни тижорат банкларининг мобил иловалари орқали реал вақт режимида сотиб олиши ва сотиши мумкин.

Янги тартиб фуқаролар ва корхоналар учун кичик суммалардан бошлаб жамғариш ва инвестиция қилиш имкониятларини кенгайтиради.

Тижорат банклари олтин қуймаларни Марказий банкдан шартнома асосида харид қилади ва уларни мустақил нархларда реализация қилади. Нархлар Лондон қимматбаҳо металлар уюшмаси (LBMA) фиксинги асосида белгиланади ва банкларнинг расмий веб-сайтларида мунтазам янгиланади.

Барча операциялар онлайн тарзда, тез ва хавфсиз амалга оширилади. Мижозларнинг идентификация ва аутентификацияси банк тизимлари орқали таъминланади.

Ушбу механизм орқали Ўзбекистон фуқаролари қимматбаҳо металлар орқали замонавий, қулай ва рақамли йўл билан жамғариш ва инвестиция қилишлари мумкин.

Электрон (жисмоний бўлмаган) кўринишдаги қимматбаҳо металл мижозга сотилади ва қайтариб сотиб олиш объекти ҳисобланади. Шу билан бирга, банк томонидан мижозга металлнинг жисмоний кўринишда тақдим этилиши тақиқланади.

Металл ҳисобварақлари орқали қимматбаҳо металларни банкнинг мобил иловаси ёрдамида сотиб олиш ва қайтариб сотиш жараёнида тўлов мижознинг мобил иловада рўйхатдан ўтган банк картаси, ҳисобварағи ёки электрон ҳамён орқали амалга оширилади.

Тўлов муваффақиятли амалга оширилгандан сўнг, банк мобил илова орқали мижозга электрон қимматбаҳо металл сотиб олинганлиги тўғрисида тасдиқнома тақдим этади.