Amazon серверларидаги узилишлар сабабли дунё бўйлаб йирик илова ва веб-сайтлар ишдан чиқди
Мазкур техник носозлик натижасида жаҳон миқёсида ўнлаб иловалар ва веб-сайтлар — жумладан Snapchat, Fortnite, Canva, PUBG, Duolingo ҳамда Perplexity AI каби машҳур платформалар фаолиятида узилишлар кузатилди.
Amazon Web Services (АWС) — Amazon’нинг булутли ҳисоблаш тизимидаги носозлик туфайли бутун дунё бўйлаб ўнлаб йирик вебсайтлар ва иловаларда узилишлар кузатилди.
Таъсир кўрсатган платформалар қаторига Snapchat, Roblox, Signal, Duolingo, Wordle, Coinbase, Slack, Pokémon Go, Epic Games, PlayStation Network ва Peloton киради. Шунингдек, Amazon’нинг ўз хизматлари, жумладан асосий чакана савдо сайти ҳамда Ring эшик қўнғироғи тизимлари ҳам ишдан чиққан.
Буюк Британияда эса Lloyds Bank, Bank of Scotland, HM Revenue and Customs вебсайти фаолиятида муаммолар кузатилди. Минглаб фойдаланувчилар иловаларга кира олмаганликларини хабар қилишган.
Буюк Британиядаги The Chartered Institute for IT мутахассиси, киберхавфсизлик бўйича эксперт Патрик Бургес бу ҳолатни шундай изоҳлади:
“Бугунги кунда дунё аҳолисининг катта қисми атиги уч-тўрт йирик булутли ҳисоблаш компаниясининг инфратузилмасига таянган. Шу сабабли шундай носозликлар содир бўлганда, у жуда кенг кўламли онлайн хизматларга таъсир кўрсатиши мумкин”.
Amazon маълумотига кўра, носозлик Виржиния штатида соат 12:00 (Тошкент вақти) атрофида бошланган. Компания 14:30 да тизимда “тикланиш аломатлари сезилаётгани”ни маълум қилди ва 15:00 га келиб глобал хизматлар қайта тикланганини тасдиқлади.
Мутахассисларнинг фикрича, бу ҳолатга киберҳужум эмас, балки техник носозлик бўлган.
