Адам Сентпетери Ипотека-банк бошқарув раиси в.б. этиб тайинланди
Ипотека-банк бошқарув раиси Сандро Ртвеладзе ўз аризасига кўра лавозимидан кетди. Унинг вазифалари вақтинча Адам Сентпетерига юклатилди. Шунингдек, банк Кузатув кенгашининг мустақил аъзоси Татиана Доган билан тузилган шартнома ҳам бекор қилинди.
“Ипотека-банк” АТИБда бошқарув раиси вазифалари вақтинча Адам Сентпетерига юклатилди. Бу ҳақдаги қарор банк акциядорларининг йиллик умумий йиғилишида қабул қилинган.
Қарорга кўра, Сандро Ртвеладзе ўз аризасига асосан бошқарув раиси лавозимидан озод этилган. Унинг ўрнига банк бошқаруви раиси ўринбосари Адам Сентпетери вақтинча бошқарув раиси вазифаларини бажаради.
Шунингдек, банк кузатув кенгашининг мустақил аъзоси Татяна Доган ҳам лавозимидан озод этилган.
Сентпетери бунгача Ипотека-банкда бошқарув раиси ўринбосари, стратегия ва молия блоки раҳбари ҳамда молиявий директор сифатида фаолият юритган. У банкка 2023 йил июль ойида қўшилган ва 2023 йил сентабрдан банк трансформация дастури учун масъул бўлиб келган.
Адам Сентпетери OTP Group тизимида ҳам узоқ йиллик тажрибага эга. У 2005 йилда OTP Гроупга макроиқтисодий таҳлилчи сифатида қўшилган, кейинчалик чакана бизнес, cонтроллинг ва стратегия йўналишларида раҳбарлик лавозимларида ишлаган.
Қарорга кўра, Сентпетери янги бошқарув раиси сайланиб, белгиланган тартибда тайинлангунга қадар банк бошқарувига вақтинча раҳбарлик қилади.
18 май куни банкнинг расмий сайтида Сандро Ртвеладзе 1 июлдан бошлаб Ипотека-банк бошқарув раиси лавозимини тарк этиши хабар қилинган эди.
