33 йиллик раҳбарлик якунланди: Женсен Хуанг Nvidia бош директорлигидан четлатилди
Сунъий интеллект чиплари ишлаб чиқарувчиси Nvidia асосчиси Женсен Хуанг бош директорликдан истеъфога чиқди. Унинг ўрнига компаниянинг молиявий директори Колетт Кресс вақтинчалик раҳбар этиб тайинланди. Қарор Хуангнинг шахсий муносабатлари ва Хитой разведкаси билан эҳтимолий алоқаларга доир можаро ортидан қабул қилинди.
Nvidia директорлар кенгаши 12 ноябрь куни Женсен Хуанг компания президенти, бош директори ва директорлар кенгаши аъзолигидан истеъфога чиққанини расман эълон қилди. Қарор дарҳол кучга кирди.
Компаниянинг амалдаги молиявий директори Колетт Кресс вақтинчалик бош директор вазифасини бажаради. У янги доимий раҳбар тайинлангунига қадар молиявий директор лавозимини ҳам сақлаб қолади.
Директорлар кенгаши доимий бош директорни танлаш жараёнини бошлади. Номзодлар компаниянинг амалдаги раҳбарлари ва ташқи мутахассислар орасидан кўриб чиқилади.
Шунингдек, Nvidia тарихида илк бор директорлар кенгаши раиси лавозими жорий этилиб, унга Ҳарви Жонс тайинланди. У илгари Synopsys компаниясига раҳбарлик қилган.
Хуангнинг истеъфоси унинг Хитой разведкасига алоқадорликда гумон қилинаётган аёл билан муносабатлари ҳақидаги хабарлар ортидан юз берди. Шунингдек, The New York Times унинг Nvidia’даги юқори лавозимли ходимлардан бири билан ҳам никоҳдан ташқари муносабатда бўлганини ёзган.
Бироқ Nvidia расмий баёнотида истеъфонинг аниқ сабаби кўрсатилмаган. Хитой разведкасига оид гумонлар ҳам исботланган факт эмас.
Reuters маълумотига кўра, истеъфо ҳақидаги хабарлар фонида Nvidia акциялари 12 ноябрь куни АҚШ биржаларидаги асосий савдолар бошланишидан олдин 10 фоиздан кўпроққа арзонлашди.
63 ёшли Женсен Хуанг 1993 йилда Nvidia’га асос солган ва 33 йил давомида компанияни бошқариб келган. Унинг раҳбарлигида Nvidia график процессорлар ишлаб чиқарувчисидан бозор қиймати 4 трлн долларга етган сунъий интеллект саноатининг етакчи компанияларидан бирига айланди.
Компания 17 ноябрь куни навбатдаги чораклик молиявий натижаларини эълон қилади. Nvidia раҳбарияти ушбу ўзгаришлар бизнес фаолияти, мижозлар олдидаги мажбуриятлар ва маҳсулотларни ривожлантириш режаларига халал бермаслигини билдирган.
