2026 йил бошидан бери АI тўлқини таъсирида технология компаниялари 100 мингдан ортиқ ходимни ишдан бўшатди
2026 йил бошидан бери глобал технология компанияларида 100 мингдан ортиқ иш ўрни қисқарди. Жумладан, Amazon тахминан 30 минг, Oracle ҳам норасмий маълумотларга кўра 30 минг атрофида, Meta 8 минг, Microsoft 8 750, Freshworks 500, Coinbase эса 700 га яқин ходим билан хайрлашган. Мазкур воқеалар Big Tech компаниялари AI инфратузилмаси ва автоматлаштиришга миллиардлаб доллар йўналтираётган бир пайтда содир бўлмоқда.
Глобал технология компаниялари 2026йилнинг дастлабки беш ойида 100 мингдан ортиқ иш ўрнини қисқартирди. Бу ҳақда PinKod ўрганган Layoffs.fyi жонли трекери маълумотларида келтирилган.
Қисқартиришлар технологияларга бўлган талаб камайгани сабабли юз бераётгани йўқ. Аксинча, йирик компаниялар харажатларини сунъий интеллект инфратузилмаси, дата-марказлар, автоматлаштириш воситалари ва юқори малакали AI мутахассисларига йўналтирмоқда. Натижада айрим анъанавий лавозимлар қисқармоқда, бошқарув поғоналари оптималлаштирилмоқда ва компаниялар камроқ ходим билан самаралироқ ишлашга уринмоқда.
Meta бу жараённинг энг яққол мисолларидан бири бўлиб турибди. Компания тахминан 8 минг нафар ходимни, яъни ишчи кучининг қарийб 10 фоизини қисқартиришни режалаштирган. Шу билан бирга, Meta AI инфратузилмаси ва сунъий интеллект билан боғлиқ ёллашларга харажатларни оширишда давом этмоқда. Компания тахминан 6 мингта очиқ вакансияни тўлдирмаслиги ҳам кутилмоқда. Бу эса Meta нафақат мавжуд иш ўринларини қисқартираётгани, балки устувор бўлмаган йўналишларда келажакдаги ёллаш суръатини ҳам пасайтираётганини кўрсатади.
Microsoft эса кескин оммавий қисқартириш ўрнига юмшоқроқ йўлни танлаган. Компания АҚШдаги тахминан 8 750 нафар ходимга ихтиёрий кетиш пакетларини таклиф қилган. Бу мамлакат бўйича Microsoft ишчи кучининг қарийб 7 фоизига тенг. Шу билан бир вақтда компания булут инфратузилмаси, дата-марказлар ва Copilot каби AI маҳсулотларига катта маблағ сарфлашда давом этмоқда.
Amazon ҳам қисқартиришлар тўлқинидан четда қолмади. Reuters хабарига кўра, компания сўнгги ойларда тахминан 30 минг нафар корпоратив ходимни ишдан бўшатган. Бу Amazon’нинг офис ходимлари таркибининг қарийб 10 фоизини ташкил қилади. Reuters, шунингдек, Amazon ва Block каби компаниялар айрим қисқартиришларни сунъий интеллект ҳисобига самарадорлик ошгани билан изоҳлаганини қайд этган.
Oracle бўйича эса расмий рақамлар очиқланмаган. Шунга қарамай, бир қатор нашрлар 2026 йил март ойи охирида компанияда тахминан 20–30 минг ходим ишдан бўшатилгани ҳақида ёзмоқда. Рақамлар расман тасдиқланмагани сабабли Oracle мисолида эҳтиёткорлик билан ёндашиш зарур.
Бу жараён фақат энг йирик технология гигантлари билан чекланиб қолмаяпти. Freshworks ишчи кучининг 11 фоизини, яъни тахминан 500 нафар ходимни қисқартиришини эълон қилган. Компания бу қарорни дастурий таъминот соҳасида сунъий интеллект тез ривожланаётгани билан изоҳлаган. Freshworks раҳбари Dennis Woodside’нинг айтишича, AI аллақачон компания кодининг ярмидан кўпроғини ёзишда ва одатий иш жараёнларини автоматлаштиришда ёрдам бермоқда.
Coinbase ҳам ишчи кучининг тахминан 14 фоизини, яъни 700 га яқин ходимни қисқартиришини эълон қилган. Компания буни крипто бозоридаги беқарорлик, харажатларни камайтириш ва бизнесни “AI даври”га мослаштириш зарурати билан боғлаган.
Бироқ экспертлар бу ҳолатни шунчаки “AI одамларнинг ишини олиб қўймоқда” деган хулоса билан тушунтириш нотўғри бўлишини айтмоқда. Айрим қисқартиришлар пандемия давридаги ҳаддан ташқари ёллаш, харажатларни камайтириш зарурати, инвесторлар босими ва AI тизимларини яратиш учун талаб қилинадиган катта маблағлар билан ҳам боғлиқ. Шунга қарамай, AI компаниялар учун тезроқ қайта тузилиш ва камроқ ходим билан кўпроқ маҳсулдорликка эришиш имконини бераётган асосий омиллардан бирига айланган.
