2025 йилда кредит ва депозит фоиз ставкалари қандай ўзгармоқда?
Миллий валютадаги ўртача кредит фоизлари пасайган бўлса, хорижий валютадаги кредитлар қимматлаша бошлаган. Депозитлар бўйича эса миллий валютадаги омонатлар ўзгаришсиз қолган, хорижий валютадаги депозитлар учун фоиз ставкалари пасайган.
Ўзбекистон Марказий банкининг маълумотларига кўра, 2025 йилнинг дастлабки икки ойида миллий валютадаги ўртача кредит фоиз ставкалари пасайган.
Январь-февраль ойларида жисмоний шахслар учун ажратиладиган миллий валютадаги кредитлар бўйича ўртача фоиз ставкаси 24,9 фоиздан 24,1 фоизга тушди. Бизнес кредитлари бўйича ўртача фоиз ставкаси эса декабрь ойидаги даражада сақланиб қолган, аммо ўтган йилнинг февраль ойидан бери 0,4 фоизга пасайган.
Миллий валютадаги депозитлар бўйича фоиз ставкалари банклар томонидан йил бошида туширилганига қарамай, ўзгаришсиз қолди ва ўртача 22,1 фоизни ташкил этди. Юридик шахслар учун очиладиган депозитлар бўйича фоиз ставкаси эса 0,1 фоиз бандга ошиб, 16,9 фоизга етди.
Хорижий валютадаги кредитлар бўйича фоиз ставкаларида ўсиш кузатилди. Қисқа муддатли кредитларнинг ўртача фоиз ставкаси 10,5 фоизга етиб, ўтган йилнинг шу даврига нисбатан 0,7 фоизга ошган. Узоқ муддатли хорижий валютадаги кредитлар бўйича ўртача фоиз ставкаси ҳам декабрь ойидаги 9,6 фоиздан 10,4 фоизга кўтарилган.
Депозитлар бўйича эса хорижий валютадаги жисмоний шахсларнинг омонатлари учун ўртача фоиз ставкаси 5,2 фоиздан 4,8 фоизга тушди. Юридик шахсларнинг хорижий валютадаги депозитлари бўйича фоиз ставкаси эса ноябрь ойидаги 6,3 фоиздан 4,1 фоизга пасайди.
Шундай қилиб, миллий валютадаги кредит ставкалари пасайган бўлса-да, хорижий валютадаги кредитлар қимматлаша бошлаган. Депозитлар бўйича эса миллий валютадаги омонатлар барқарор қолган, хорижий валютадаги депозитлар бўйича фоиз ставкалари пасайган.
