Хитой АҚШ маҳсулотларига нисбатан бож тарифларини 125 фоизгача оширди

Хитой жума куни АҚШдан импорт қилинадиган маҳсулотларга бож ставкаларини 84 фоиздан 125 фоизгача оширишини эълон қилди. Янги тарифлар 12 апрель санасидан кучга киради.

Мазкур чоралар АҚШ томонидан Хитойга нисбатан жорий этилган юқори бож тарифларига жавобан амалга оширилмоқда. Оқ уйнинг баёнотига кўра, Хитойга қўлланилаётган тарифлар аввал хабар қилингандек 125 фоиз эмас, балки 145 фоизни ташкил қилади.

Хитой Молия вазирлиги ўзининг кескин баёнотида АҚШни “зўравонлик”да айблаб, бу сиёсат халқаро миқёсда АҚШни масхарага айлантириши мумкинлигини таъкидлади.

“АҚШнинг Хитойга нисбатан ўта юқори бож ставкаларини бир томонлама жорий қилиши – халқаро иқтисодий ва савдо қоидаларининг очиқ-ойдин бузилишидир. Бу ҳолат, шунингдек, Иккинчи жаҳон урушидан сўнг АҚШнинг ўзи асос солган глобал иқтисодий тартибга зид келади.

 Бундай ёндашув асосий иқтисодий қонунлар ҳамда соғлом мантиққа мутлақо тўғри келмайди. Бу тўлиқ бир томонлама босим ва мажбурлашдан бошқа нарса эмас”, — дейилади баёнотда.

Хитой ҳукумати, шунингдек, агар АҚШ божхона ставкаларини оширишда давом этса, бу ҳаракатлар иқтисодий жиҳатдан фойдасиз бўлиб қолишини ва жаҳон иқтисодиёти тарихида энг кулгили мисоллардан бири сифатида эсда қолишини маълум қилган.

Баёнотда яна қайд этилишича, агар АҚШ “бож ставкалари билан рақамли ўйин”ни давом эттирса, Хитой бу ҳаракатларга эътибор қаратмаслик йўлини танлайди.