Oʻzbekiston xalqaro oltin-valyuta zaxiralari $50 mlrdga yaqinlashdi
Zaxiralar tarkibidagi oltinning umumiy qiymati $772,6 mlnga oshib, $37,65 mlrdga yetdi.
Shunga qaramay, oltinning fizik hajmi pasayishda davom etmoqda — aprel oyida 11,82 mln troya unsiyadan 11,46 mln troya unsiyagacha kamaydi.
Oʻzbekistonning xalqaro oltin-valyuta zaxiralari rekord darajaga yetdi. Bu haqda Markaziy bank tomonidan eʼlon qilingan navbatdagi hisobotda maʼlum qilindi.
2025 yil 1 may holatiga koʻra, mamlakatning umumiy zaxiralari $49,25 mlrdni tashkil etgan boʻlib, bu oʻtgan oyga nisbatan 1,4 milliard dollarga koʻproqdir.
| Koʻrsatkichlar | 1 yanvar 2025 | 1 aprel 2025 | 1 may 2025 |
| Rasmiy zaxira aktivlari (mlrd $) | 41,2 | 47,9 | 49,2 |
| Oltin (mlrd $) | 32,03 | 36,88 | 37,65 |
| Sof hajmi (mln troya unsiya) | 12,3 | 11,8 | 11,4 |
| Xorijiy valyutadagi zaxira aktivlari (mlrd $) | 8,6 | 10,41 | 11,03 |
Izoh: koʻrsatkichlar yaxlitlangan.
Zaxiralar tarkibidagi oltinning umumiy qiymati $772,6 mlnga oshib, $37,65 mlrdga yetdi. Shunga qaramay, oltinning fizik hajmi pasayishda davom etmoqda — aprel oyida 11,82 mln troya unsiyadan 11,46 mln troya unsiyagacha kamaydi. Bu holat, asosan, oltin eksporti hajmining oshishi bilan izohlanadi.
Valyuta zaxiralari ham oʻsishda davom etmoqda. Aprel oyida ular qariyb $0,6 mlrdga ortib, 11,03 milliard dollarga yetdi.
Shuningdek, Markaziy bank tomonidan sotib olingan qimmatli qogʻozlar hajmi aprel oyida keskin — 3,5 baravar oshib, $703,9 mlnni tashkil etdi.
Avvalroq, Jahon oltin kengashi Oʻzbekiston 2025 yilning birinchi choragida dunyodagi eng yirik oltin sotuvchisi boʻlganini maʼlum qilgandi.
